Аб’ём жыллёвага будаўніцтва ў І квартале знізіўся амаль на 12%



У студзені-сакавіку 2017 года ў Беларусі арганізацыямі ўсіх формаў уласнасці пабудавана 11,6 тыс. новых кватэр. Уведзена ў эксплуатацыю 994,1 тыс. квадратных метраў агульнай плошчы жылля, што на 11,8% менш, чым за аналагічны леташні перыяд, сведчаць дадзеныя афіцыйнай статыстыкі.

У сакавіку пабудавана 351,5 тыс. квадратных метраў, што на 7,7% менш, чым у сакавіку 2016 года, і на 36,8% больш, чым у лютым 2017 года.

Для грамадзян, якія стаяць на ўліку для паляпшэння жыллёвых умоў, уведзена ў эксплуатацыю 357,1 тыс. квадратных метраў агульнай плошчы, або 35,9% агульнага аб’ёму ўведзенага жылля.

З агульнага аб’ёму ўведзенага жылля для грамадзян, якія стаяць на ўліку для паляпшэння жыллёвых умоў, пабудавана: з выкарыстаннем дзяржаўнай падтрымкі — 168,3 тыс. квадратных метраў (на 54,4% менш), у шматкватэрных жылых дамах у гарадах — 207,4 тыс. квадратных метраў.

У сельскіх населеных пунктах уведзена ў эксплуатацыю 271,8 тыс. квадратных метраў агульнай плошчы жылля, або 27,3% агульнага ўводу па краіне.

У 2016 годзе ўведзена ў эксплуатацыю за кошт усіх крыніц фінансавання 4 млн 285,7 тыс. квадратных метраў жылля — на 15,2% менш у параўнанні з 2015 годам.

У 2017 годзе плануецца пабудаваць 3,5 млн квадратных метраў жылля. Фінансаванне з усіх крыніц складзе 3,7 млрд рублёў. Ва ўрадзе разлічваюць, што гадавая праграма будаўніцтва жылля будзе на 77% прафінансавана з уласных сродкаў насельніцтва.

Як раней заяўляў БелаПАН начальнік упраўлення жыллёвай палітыкі Міністэрства архітэктуры і будаўніцтва Аляксандр Горваль, аб’ёмы жыллёвага будаўніцтва залежаць не ад будаўнікоў, а ад фінансавання. Вытворчая будаўнічая база дазваляе будаваць 10 млн квадратных метраў жылля ў год. „Будзе больш грошай, будзем больш будаваць”, — сказаў прадстаўнік Мінбудархітэктуры.

belapan.by