Алесь Краўцэвіч пачаў у Гародні цыкл лекцый па гісторыі Беларусі



У Цэнтры гарадскога жыцця Гародні для аматараў гісторыі пачаўся цыкл лекцый вядомага навукоўца, прафесара Алеся Краўцэвіча. Назва цыклу „Беларусь у еўрапейскім кантэксце. Гісторыя народу памежжа.”

На першым занятку лектар распавёў прысутным гарадзенцам пра вандроўку народаў і паўстанне Беларусі.

Алесь Краўцэвіч кажа, што сістэма адкацыі ў Беларусі знаходзіцца пад пільным кантролем прарасейскіх сілаў.

– Незалежніцкія падручнікі былі забароненыя яшчэ ў 1995 годзе. Затым паціху выціскаліся з сістэмы адукацыі незалежныя гісторыкі. Людзі, якія працуюць сёння ў сістэме адукацыі мусяць выкладаць па афіцыйных падручніках. Яны асцярагаюцца, бо ў любы момант іх могуць абвінаваціць у нелаяльнасці да рэжыму і выгнаць з працы. А падручнікі ў нас, якія ўвёў Лукашэнка ў сістэму адукацыі, прарасейскія, там беларуская гісторыя падаецца як гісторыя калоніі Расеі. Я належу да так званых суб’ектных гісторыкаў, якія лічаць, што беларусы былі ўласнымі творцамі ўласнай гісторыі.

Дырэктар Цэнтру гарадскога жыцця Павел Мажэйка мяркуе, што такія лекцыі будуць спрыяць таму, каб жыхары Гародні пазнавалі сваю сапраўдную гісторыю, без „белых плямаў” у мінулым.   

– Не сакрэт, што беларуская гісторыя па-ранейшаму застаецца з „белымі плямамі”, з перакручанымі падзеямі, фактамі, ацэнкамі. Таму адна з мэтаў лекцый – даць магчымасць прафесійным гісторыкам выказацца, а слухачам прыняць гэтыя ацэнкі, паспрачацца з імі, падыскутаваць і ў выніку сфармаваць нейкае агульнае меркаванне.

У Цэнтры гарадскога жыцця Гародні ўжо існуе некалькі цыклаў лекцый, якія апрача Алеся Краўцэвіча, праводзяць гісторыкі Юры Гардзееў ды Генадзь Семянчук. Наступная лекцыя Алеся Краўцэвіча адбудзецца 2 сакавіка. Яе назва: „На скрыжаваннях Еўропы. 10 ст. – сярэдзіна 13 ст.)

Якуб Сушчынскі, Беларускае Радыё Рацыя

Фота аўтара