Скульптуру „Дзед-глыбачанін” адкрылі ў Глыбокім



Манументальна-дэкаратыўную скульптуру „Дзед-глыбачанін” адкрылі ў Глыбокім на свяце горада. Гэта зборны вобраз жыхара горада. Прататыпам з’яўляецца педагог, гісторык, краязнаўца з Глыбокага Аляксандр Сабалеўскі.

Ініцыятарамі ўстаноўкі скульптуры на беразе возера і спонсарамі сталі ўнукі Аляксандра Сабалеўскага – Дзмітрый і Антон.

smotkina_pomnik_9

 На фота – унукі Аляксандра Сабалеўскага Дзмітрый і Антон

На помнік было выдаткавана каля аднаго мільярда трыста мільёнаў беларускіх рублёў.

smotkina_pomnik_14

На фота – скульптар Аляксандр Тухто

Па словах аўтара помніка, менскага скульптара Аляксандра Тухто, над скульптурай працавалі каля года.

– Помнік рабіўся спачатку ў пластыліне, пасля фармаваўся, потым на завод – адліваўся ў бронзе. Было цікава распрацоўваць гэтую кампазіцыю. З Сабалеўскімі мы сустракаліся, думалі: як і што. І вось, калі такая кампазіцыя з’явілася, усе пагадзіліся: гэта тое, што трэба, лягло на душу.

Скульптура адлюстроўвае пажылога інтэлігентнага мужчыну ў капелюшы. На каленях у яго кніга. Ён вяртаецца з рыбалкі, а ў лодцы знаходзіцца злоўленая рыба. Побач з мужчынам сядзіць кот.

Да таго помнік утрымлівае дадатковыя вобразы глыбоцкіх храмаў, касцёла і царквы, якія сімвалізуюць духоўнасць, добрасуседства вернікаў розных канфесій.

Таццяна Смоткіна, Беларускае Радыё Рацыя