У Дунілавічах аднаўляюць культ абраза Маці Божай Ларэтанскай



Цудатворны абраз Маці Божай Ларэтанскай зноў пачаў жыватворна ўздзейнічаць на парафіянаў у Дунілавіцкім касцёле Прасвятой Тройцы, што на Пастаўшчыне. Паводле пробашча парафіі Паўла Самсонава, абраз датуецца другой паловай сямнаццатага стагоддзя.

abraz_dunilavichy_1

Раней вернікі прыносілі да яго шмат вотаў, але за камуністычнымі часамі яны зніклі, а абраз, дзякуючы вернікам, застаўся ў парафіі.

– Мы зноў распачалі гэты культ Маці Божай Ларэтанскай аднаўляць, і на сённяшні дзень ужо ёсць чатыры воты. Першы падарунак – залаты пярсцёнак, заручальны, людзі прынеслі як знак удзячнасці Маці Божай за тое, што ўратавала іх сям’ю. Затым пачалі з’яўляцца другія воты – залаты ланцужок, залатыя завушніцы, залаты крыжык. Людзі пакуль што сказалі: мы не хочам да канца адкрываць нашую таямніцу, за што тыя воты, прыйдзе той час, калі мы скажам. І я чакаю.

Абраз Маці Божай Ларэтанскай, які вернікі лічаць цудатворным, паходзіць з Фларэнцыі, адноўлены ў Дунілавічах у 1995 годзе. Ён быў падараваны віленскім біскупам Мікалаем Пацам фундатарцы касцёла Эльжбеце, жонцы Крыштофа Белазора. А яна гэты абраз ахвяравала касцёлу.

Беларускае Радыё Рацыя