* У 1918 годзе 20 лютага атрады Вялікай беларускай рады і корпус Доўбар-Мусніцкага ўзялі пад свой кантроль Мінск. Камендант горада Канстанцін Езавітаў увёў у Мінску ваеннае становішча.
* А праз год, 20 лютага ў 1919 годзе, пачаў сваю дзейнасць Мінскі губернскі ваенна-рэвалюцыйны камітэт на чале з Савацьевым. Гэта быў найвышэйшы надзвычайны орган Савецкай улады на тэрыторыі Мінскай губерніі ў наступныя два гады.
* А ў 1925 годзе ў Беларускім дзяржаўным універсітэце адбыўся першы выпуск спецыялістаў. Выпусцілі 55 эканамістаў і юрыстаў.
* У 1938 годзе пастановай прэзідыума Цэнтральнага выканаўчага камітэту БССР былі скасаваныя Лепельскі, Мазырскі, Полацкі і Слуцкія раёны.
* 1943 год. 20 лютага карнікі спалілі жыўцом 30 жыхароў вёскі Росіца Браслаўскага раёна. Ксяндзы Юры Кашыра і Антоні Ляшкевіч не пакінулі вернікаў і прынялі разам са сваімі парафіянамі пакутніцкую смерць.
* У гэты дзень нарадзіўся Валерый Мазынскі. Заснавальнік “Вольнай сцэны” прыйшоў на свет у 1947 годзе. Сваю кар’еру тэатральнага рэжысёра ён пачаў у тэатры імя Коласа ў Віцебска, на яго прэм’ерах п’есаў “Кастусь Каліноўскі” і “Званы Віцебску” прысутнічаў Уладзімір Караткевіч. У 90-х Мазынскі пераехаў у Мінск, стварыў свой тэатр і ставіў спектаклі ў Купалаўскім тэатры. Але потым улады тэатр закрылі, цяпер Мазынскі вымушаны падрабляць кур’ерам.
* У гэты дзень памёр славуты беларускі астраном Марцін Пачобут-Адляніцкі. Гэта здарылася 20 лютага 1810 году. Менавіта Пачобут-Адляніцкі арганізаваў і ўзначаліў Віленскую астранамічную абсерваторыю, быў прафесарам Віленскай акадэміі, рэктарам галоўнай школы Вялікага Княства Літоўскага.
* Таксама ў гэты дзень 20 лютага 1963 году памёр кампазітар Канстанцін Галкоўскі. Яго лёс быў звязаны з Вільняй. Тут ён нарадзіўся, выкладаў у Віленскай кансерваторыі і пражыў усё жыццё. Ён пісаў музыку на вершы беларускіх паэтаў, ён аўтар шматлікіх рамансаў і хораў на вершы Францішка Багушэвіча, Янкі Купалы, Якуба Коласа, Максіма Танка, Змітрака Бядулі, Канстанцыі Буйло. Цікава, што Галкоўскі быў прызнаны народным артыстам Літоўскай ССР.
