На пазачарговым паседжанні кардынацыйнай рады аблвыканкама па ахове матэрыяльнай і духоўнай спадчыны абмяркоўвалася канцэпцыя стварэння гісторыка-культурнага цэнтра нацыянальнага маштабу на шырокіх тэрыторыях Берасцейскай крэпасці.

Да 1000-годдзя Берасця, якое будзе адзначацца ў 2019 годзе, на тэрыторыі крэпасці адновяць Берасцейскі замак з рамесным дваром, карчмой, вадзяным млыном і броварам. На тэрыторыі Кобрынскага ўмацавання плануецца стварыць Нацыянальны музей тэхнікі, музей узбраенняў і пашырыць музей абароны Берасцейскай крэпасці. На Валынскім - узвесці макет сярэднявечнага Бярэсьця ў маштабе 1:5 і правесці кансервацыю комплексу Бернардынскіх манастыроў 17-18 стагоддзяў. На ўездзе ў крэпасць прадугледжаныя паркінгі для аўтамабіляў, побач карэтны двор з пракатам экіпажаў і верхавых канёў, база электрамабіляў і ровараў. На перспектыву запраектаваная аглядная лінная дарога, якая злучыць крэпасць з паркам, чыгуначным вакзалам і цэнтрам горада. Пакуль праект выглядае фантастычным і нерэальным, засталося толькі дачакацца. Усе працы плануецца завяршыць праз 10 гадоў, да 1000-я горада.

4 - 5 кастрычніка ў 30 краінах Еўропы, у тым ліку і ў Беларусі, прайшлі Еўрапейскія восеньскія дні назірання за птушкамі. У рамках мерапрыемства Заходне-Палескае аддзяленне грамадскай арганізацыі "Ахова птушак Бацькаўшчыны" у Берасці, Кобрыне, Лунінецкім і Іваноўскім раёнах арганізавала адмысловыя наглядальныя пляцоўкі за птушкамі, адтуль з дапамогай аптычных прыбораў можна было ўбачыць рэдкія віды птушак: вялікую белую чаплю, кулікоў і нават жураўліны клін. У Берасці такая пляцоўка была арганізаваная на набярэжнай ракі Мухавец каля прыстані цеплахода "Гародня".

У выставачнай зале Холмскіх варотаў мемарыяльнага комплексу "Берасцейская крэпасць-герой" 7 кастрычніка распачала працу экспазыцыя пад назовам "З нечалавечай жорсткасцю…". На шматлікіх стэндах выставы размешчаныя фотадакументы, якія распавядаюць аб злачынствах войска фашысцкай Нямеччыны на тэрыторыі Польшчы ў верасні-кастрычніку 1939 года. Экспанаты прадстаўленыя варшаўскім Інстытутам народнай памяці пры падтрымцы Генеральнага консульства Рэспублікі Польшча ў Берасці. Над стварэннем экспазыцыі працавалі польскія і нямецкія гісторыкі. У 2004 годзе яна ўпершыню была паказана ў Польшчы, затым у Германіі і Чэхіі. У Берасці выстава будзе працаваць да 31 кастрычніка.

 Берасцейскі гарвыканкам аб'яўляе аб пачатку штогадовага адчыненага музычнага конкурсу "Залатая восень-2008". Удзельнічаць у конкурсе могуць моладзевыя рок-групы як Берасця, так і іншых гарадоў. Адна з умоў - узрост музыкаў павінен быць у межах 14 - 31 года. Плюс, вядома, годны ўзровень выканання. Заяўкі і дэма-запісы прымаюцца да 10 лістапада. Усю інфармацыю можна атрымаць у аддзеле па справах моладзі Берасцейскага гарвыканкама.

Пры падтрымцы Беларускай асацыяцыі журналістаў у Берасці стартуе конкурс-праект маладой журналістыкі "Праз Брэст у Еўропу". Галоўнай мэтай з'яўляецца павышэнне актыўнасці і цікавасці моладзі да вывучэння і асвятлення гісторыі, культурных асаблівасцяў і турыстычнага патэнцыялу Берасцейшчыны, як непаўторнага рэгіёна Еўропы. Да ўдзелу ў конкурсе запрашаюцца школьнікі і студэнты ўсіх навучальных устаноў горада. Да 10 лістапада журы конкурсу, якое складаецца з вядомых журналістаў і краязнаўцаў будзе прымаць працы па тэме "Праз Брэст у Еўропу". Гэта могуць быць калектыўныя працы: школьныя і студэнцкія сценгазеты, розныя самвыдаты. Акрамя таго, будзе праводзіцца асобны конкурс  па наступных індывідуальных намінацыях:

"          лепшы фотарэпартаж;

"          лепшы артыкул па тэме;

"          лепшая праца ў мастацка-літаратурным жанры (аповяд, казка, верш, карыкатура).

Пасля падвядзення вынікаў, аўтары лепшых прац атрымаюць прызы, а 15 з іх прымуць удзел у семінарах першакласных журналістаў-практыкаў, а пасля іх завяршэння адправяцца ў 5 займальных прэс-тураў па памятных і значных мясцінах Берасцейскай вобласці. Працы прымаюцца на электронны адрас: bresteurope@gmail.com

 Паша Бярозавы, Радые Рацыя