Гэта рубрыка ў RSS
Cёння за ўдзел у канцэрце польскага гурта “Ломбард”, які адбыўся ў Гродне 2 траўня, супрацоўнікі міліцыі склалі пратакол аб адміністрацыйным правапарушэнні на намесніка старшыні партыі "Беларуская сацыял-дэмакратычная Грамада", праваабаронцу Віктара Сазонава.
Маёр міліцыі Пётр Ленец, які складаў пратакол, палічыў, што Віктар Сазонаў парушыў беларускае заканадаўства тым, што прыйшоў паслухаць легендарны польскі гурт “Ломбард”, канцэрт якога адбыўся у Гродне ў межах святкавання Дня Палоніі.
Паводле артыкула 23.34 адміністрацыйнага кодэкса, Віктара Сазонава чакае штраф у памеры да 30 базавых велічынь ці адміністрацыйны арышт. На яго думку, захады міліцыянтаў звязаныя са страхам уладаў перад магчымасцю людзей зразумець каштоўнасці еўрапейскай культуры і стаць іх часткай.
- Няма сумневу ў тым, што Беларусь стане часткай аб’яднанай Еўропы, у сувязі з чым сённяшнія ўлады вельмі напалоханыя зацікаўленасцю людзей да заходняй культуры. А калі ўлічыць, што падчас канцэрта ў паветры луналі нацыянальныя сцягі Польшчы і Еўрасаюзу побач з нашымі бел-чырвона-белымі сцягамі, усё становіцца зразумелым, - кажа Віктар Сазонаў.
За арганізацыю і ўдзел у канцэрце гурта “Ломбард” у Гродне, акрамя Віктара Сазонава, да адміністрацыйнай адказнасці бліжэйшым часам будуць прыцягнутыя кіраўнік непрызнанага беларускімі ўладамі Саюза палякаў у Беларусі Анжаліка Борыс і старшыня абласной суполкі Аб’яднанай грамадзянскай партыі Юры Істомін, на якіх супрацоўнікі міліцыі ўжо склалі пратаколы аб адміністрацыйных правапарушэннях.
