З запаснікаў беларускіх музеяў знікла 345 каштоўных экспанатаў

Усе зніклыя экспанаты ўтрымлівалі каштоўныя металы.

Як паведаміў на прэсавай канферэнцыі намеснік міністра культуры Віктар Кураш, гэта высветлілася падчас інвентарызацыі музейных фондаў, якая ўпершыню адбылася летась.

Праўда, большасць з экспанатаў была раскрадзеная яшчэ напрыканцы 80-х гадоў. У асноўным махляры, збольшага самі супрацоўнікі музеяў, цікавіліся ордэнамі і медалямі часоў Вялікай Айчыннай вайны.

- Па ўсіх фактах праводзілася расследаванне, былі ўзбуджаныя крымінальныя справы, некаторых нават умоўна асудзілі. А па некаторых справах следчыя дзеянні пакуль працягваюцца, - сказаў В.Кураш.

Усяго ж падчас інвентарызацыі камісія Мінкульта не далічылася 2 743 экспанатаў. А агульная лічба каштоўнасцяў, якія знаходзяцца ў беларускіх музеях, складае 2 мільёны 857 тысяч 700 адзінак, паведаміў чыноўнік.

Кастусь ВАНСЯЦКІ