Гэта рубрыка ў RSS
Міжнародная прэса абмяркоўвае абранне дзеючага расійскага прэзідэнта Уладзіміра Пуціна на пасаду старшыні партыі “Адзіная Расія”.
The New York Times адзначае, што Пуцін падрыхтаваў глебу для шматгадовага праўлення разам з Мядзведзевым. Учорашні з’езд “Адзінай Расіі” газета называе “аб’яднаннем у сваім абліччы элементаў амерыканскага палітычнага кангрэса, з’езда КПСС і карпарацыйнага прапагандысцкага мітынгу”.
Нямецкая Frankfurter Rundschau лічыць, што Пуцін вырашыў загадзя пашырыць паўнамоцтвы кіраўніка ўраду, не чакаючы свайго прызначэння прэм’ер-міністрам. “Упаўнаважаныя прадстаўнікі прэзідэнта на месцах цяпер будуць падначальвацца прэм’еру, і ў рэгіёнах яны будуць стаяць над усімі рэгіянальнымі прадстаўнікамі федэральных міністэрстваў і ведамстваў”, - піша нямецкая газета.
Пра падвышэнне палітычнага аўтарытэту Пуціна праз абранне старшынёй “Адзінай Расіі” піша амерыканскае The Wall Street Journal.
“Узяўшы пад кантроль правячую партыю, Пуцін гарантуе сваю будучыню, што б ні здарылася з яго цяпер моцным сяброўствам з Мядзведзевым”, - піша іспанская El Pais.
Выданне Financial Times аналізуе прычыны, якія могуць пацягнуць за сабой канец амерыканскага панавання ў свеце. У гэтым пытанні аглядальнік газеты Рычард Хаас выдзяляе тры чыннікі. Першы – актыўнае развіццё новых краін. “Узлёт новых сіл нельга спыніць. У выніку пашыраецца колькасць гульцоў, якія здольныя аказваць рэгіянальны ці глабальны ўплыў. Прычына не ў тым, што ЗША сталі слабымі, - проста шмат якія сілы ўзмацніліся”, - піша Financial Times. Другая прычына завяршэння эры аднапалярнасці, па меркаванні газеты, - палітычны курс ЗША: “Як сваімі справамі, так і за кошт таго, чаго ў іх не атрымалася зрабіць, Злучаныя Штаты паскорылі працэс узнікнення новых цэнтраў магутнасці і аслабілі свае ўласныя пазіцыі ў адносінах да іх”. Financial Times піша пра адсутнасць энергетычнай палітыкі ЗША і неэфектыўнасць эканамічнай. “Прэзідэнт Буш вядзе дарагія войны ў Афганістане і Іраку, дазваляе выдаткам узрастаць на 8% на год і змяншае падаткі”, - падкрэслівае аглядальнік Financial Times. У выніку, ён прыходзіць да высновы, што “для сённяшняга аднапалярнага свету ўсё больш характэрная рассеянасць, а не сканцэнтраваная магутнасць. На змену аднапалярнасці прыйдзе не біпалярнасць і не шматпалярнасць, - а адсутнасць полюсаў, “беспалярнасць”.
Папа Рымскі Бенедыкт XVI выказаў шкадаванне з нагоды існавання сэксуальных скандалаў у каталіцкай царкве. Пра гэта піша англійская Independent. Як паведамляе выданне, “падчас учорашняга пералёту ў ЗША панціфік сказаў, што сэксуальныя злачынствы ў адносінах да дзяцей “вельмі цяжка адбіваюцца” на Царкве і на “мне асабіста”. “З 2002 года было зафіксавана больш за пяць тысяч выпадкаў спакушэння непаўнагадовых святарамі. Гэтыя скандальныя падзеі абышліся Царкве ў 2 мільярды долараў, якія пайшлі на кампенсацыі тым, хто пацярпеў”, - паведамляе Independent.
Кіраўніцтва футбольнага клуба “Чэлсі” плануе напрыканцы сезону правесці масавую чыстку, - піша лонданская The Times. Як стала вядома газеце, клуб могуць пакінуць да дзесяці гульцоў першага складу. “Гэта будуць самыя значныя змены за апошнія пяць год – з лета 2003 году, калі Абрамовіч атрымаўшы беспрэцэдэнтныя выдаткі пасля пакупкі клуба”, - адзначае выданне. Па інфармацыі The Times, “Чэлсі” можа прадаць такіх гульцоў, як Андрэй Шаўчэнка, Клаўдзіа Піцаро, Стыў Сайдуэл і Таль Бэн Хаім.
