“Вадзіма Юшко з Лепеля прызвалі ў войска летам 2005 года. Праз паўгады службы ён трапіў у шпіталь. І праз тры месяцы памёр”, піша “Комсомольская правда в Белоруссии”.
Згодна з афіцыйнай версіяй пракурорскай праверкі, салдат памёр ад захворвання, “атрыманага ў перыяд вайсковай службы”.
Сёння крымінальная справа ўзбуджана грамадзянскай пракуратурай толькі ў дачыненні да медсупрацоўнікаў Віцебскай лякарні аб неналежным выкананні прафесійных абавязкаў, якія прывялі да смерці па неасцярожнасці. Справа доўжыцца ўжо 1,5 гады. Але бацькі ўпэўненыя, што вінаватае ў першую чаргу войска.
Яны распавялі “КП”, што раней іх сын ніколі не хварэў і не ляжаў у шпіталях. Ужо пасля шпіталізацыі Вадзім Юшко распавёў сваім бацькам, што ў войску яго моцна збілі, што і сталася прычынай хваробы. Цяпер бацькі памёрлага салдата дамагаюцца праўды.
Акрамя маці Вадзім прызнаўся свайму суседу па бальнічнай палаце, што патрапіў сюды з-за збіцця ў войску. І гэтыя паказанні сведкі ёсць у крымінальнай справе грамадзянскай пракуратуры Віцебскай вобласці.
- Але ваенная пракуратура на ўсе нашы звароты адмаўляецца вяртацца да войска, спасылаючыся на вынікі першай праверкі Віцебскай міжгарнізоннай ваеннай пракуратуры, падчас якой "фактаў гвалту ў дачыненні да Юшко не ўсталявана", - тлумачаць бацькі.
Акрамя таго, па матэрыялах праверкі цялесных пашкоджанняў пры аглядзе ў салдата не было. Але справа ў тым, што хлопец тры дні (а можа і чатыры - у справе ёсць супярэчлівыя дакументы з датай звароту Вадзіма за меддапамогай) правёў на пасцельным рэжыме ў казарме, як вынікае з паказанняў камандзіра ўзвода забеспячэння Зміцера Ліпскага. Між тым, па Статуце ўнутранай службы, калі ў салдата цяжкае захворванне, яго неадкладна павінны даставіць у медроту пад стацыянарнае назіранне. Такога рэжыму, як "казарменны", у статуце няма. Але аб тым, ці аглядаўся Вадзім у медпункце сваёй ваеннай часткі і ці былі цялесныя пашкоджанні ў гэты перыяд, у праверцы ні слова. Таму бацькі і лічаць, што камандзіры проста хавалі некалькі дзён сына ў частцы замест таго, каб тэрмінова праводзіць службовую праверку і забяспечыць шпіталізацыю.
Бацькоў Вадзіма, якія дагэтуль дамагаюцца праўды, хвалюе не толькі гонар сына. Калі ўсё так проста можна спісаць на захворванне, дзе гарантыя жыцця іншых салдатаў?
