Невядомы чалавек, які прадставіўся супрацоўнікам КДБ, прапанаваў супрацоўніцтва актывісту маладзёвай арганізацыі “Грамадзянскі форум”, жыхару Жыткавічаў Аляксандру Бандзюку.
Па яго словах, 20 лютага яму патэлефанавалі з райваенкамата і запрасілі на сустрэчу. Ваенныя паведамілі, што ім трэба ўдакладніць звесткі пра маладога чалавека што да прызыву.
“Калі я прыйшоў у ваенкамат, мяне запрасілі да ваенкама ў кабінет. Ваенкам мяне сустрэў, сам выйшаў і пакінуў адзін на адзін з чалавекам у цывільным. Той сказаў, што ён прадстаўляе КДБ, а я цікаўлю спецслужбы таму, што маю лідэрскія здольнасці і мог бы быць ім карысны. Затым кэдэбіст паведаміў, што ў Жыткавічах арганізацыя “Грамадзянскі форум” маларазвітая, ёй патрэбна падтрымка, асабліва легальная, і КДБ можа нам дапамагчы - камп’ютэрам і грашыма. Мне асабіста гэты чалавек прапанаваў аднаўленне ў Гомельскім універсітэце, з якога я быў выключаны у 2006 годзе”, — удакладніў Аляксандр Бандзюк.
Па словах актывіста, чалавек у цывільным прапанаваў яму зноў сустрэцца 27 лютага у “больш неафіцыйным месцы”.
Павел КАТВІЦКІ
