Актывісты выйшлі да шматлюднага прыпынку каля амфітэатру. Іх было няшмат – бо рашэнне наконт правядзення акцыі было прынятае ў апошні момант. Што, тым не менш, не перашкодзіла міліцыі і грамадзянам у цывільным адразу ж з’явіцца на гэтым месцы.
Міліцыя з’явілася, як толькі былі запаленыя чатыры свечкі каля партрэтаў Ірыны Казулінай. Праваахоўнікі адразу папярэдзілі пра незаконнасць акцыі. Тлумачэнні, што гэта - грамадзянская паніхіда, іх не ўразілі. Таму арганізатары акцыі вырашылі разыйсціся, бо спадзяюцца, што Аляксандра Казуліна сёння ўвечары ўсё ж адпусцяць у Мінск на пахаванне жонкі. Яны таксама збіраюцца прысутнічаць на развітанні з жонкай экс-кандыдата ў прэзідэнты краіны.
Варта заўважыць, што большасць мінакоў ведала пра смерць Ірыны Казулінай, і спынялася з пытаннямі да арганізатараў акцыі.
Алена ГРЫНЯВІЦКАЯ
