Супрацоўнікі ўпраўлення Камітэта дзяржаўнай бяспекі па Гродзенскай вобласці спрабуюць выклікаць на размову маладога апазіцыйнага палітыка з Мастоў Алеся Зарэмбюка, які, у сваю чаргу, патрабуе ад чэкістаў выканання беларускага заканадаўства, паводле якога існуе адмысловая працэдура наведвання падобных установаў.
Капітан КДБ Алег Жывушка патэлефанаваў сёння апазіцыйнаму палітыку Алесю Зарэмбюку і прапанаваў сустрэцца дзеля адмысловай размовы. Палітык не мае вялікага жадання размаўляць з прадстаўнікамі Камітэта дзяржбяспекі, у сувязі з чым правамоцна патрабаваў ад капітана Жывушкі прытрымлівацца заканадаўства і даслаць адмысловую позву.
- Я пацікавіўся, з якой нагоды і ў якасці каго мяне выклікаюць, на што капітан Жывушка паведаміў пра тое, што мае жаданне са мною паразмаўляць. Але я лічу, што ўпраўленне КДБ не дом сустрэчаў, таму прапанаваў гродзенскім “чэкістам” дзейнічаць у межах закона.
На думку Зарэмбюка, супрацоўнікаў Камітэта дзяржаўнай бяспекі зацікавіла яго грамадская дзейнасць. Не выключана, што ў выпадку атрымання позвы ён наведае дзяржаўную ўстанову 7 сакавіка.
На працягу апошняга часу супрацоўнікі КДБ па Гродзенскай вобласці актывізавалі сваю дзейнасць у адносінах да грамадскіх актывістаў. Некалькі тыдняў таму капітан Алег Жывушка меў размову з актывістам руха “За свабоду” Эдвардам Дмухоўскім.
Радыё Рацыя
