У сядзібе філіі Партыі БНФ у Віцебску сямёра сябраў абласной Рады ды іншыя ахвотныя ў межах агульнарэспубліканскай акцыі напісалі дыктоўку на беларускай мове.
Старшыня абласной арганізацыі Кастусь Смолікаў, які выконваў ролю настаўніка, прапанаваў сваім калегам-аднадумцам той самы тэкст Францішка Багушэвіча, які пісалі 15 сакавіка на сядзібе ТБМ імя Францішка Скарыны ў Мінску амбасадары замежных дзяржаў. На пытанне, як мясцовыя актывісты здолелі напісаць дыктоўку са знакамітымі словамі: “Дзе ж цяпер Беларусь? Там, братцы, яна, дзе наша мова жыве!..”, спадар Смолікаў з усмешкай адказаў:
- Не вельмі добра. Тут трохі цяжкаваты тэкст: такія абароты, шмат знакаў прыпынку...
Гэта была пакуль першая дыктоўка ў Віцебску. Сябры БНФ рыхтуюцца да іншых.
- Таксама падалі заяўку на нядзелю ў абласную бібліятэку, каб на паўгадзіны нам выдзелілі беларускую залу для правядзення дыктоўкі. У чацвер будзе пісаць моладзь БНФ, - паведаміў Рацыі Кастусь Смолікаў.
Алена ГРЫНЯВІЦКАЯ
