Гэта рубрыка ў RSSПрыгадаць, як пішуцца дыктоўкі, давялося ўчора літоўскім беларусам і студэнтам Еўрапейскага гуманітарнага універсітэту ў Вільнюсе.
Тэкст "Прадмовы" да "Дудкі Беларускай" Францішка Багушэвіча прысутным старанна дыктаваў арганізатар праверкі ведаў Алег Грубіч.
Ад стандартнага гуказапісу тэксту вырашылі адмовіцца. На думку Алега Грубіча, жывы кантакт з аўдыторыяй лепшы за награнае чытанне. Арганізатар падкрэсліў душэўнасць атмасферы імпрэзы, яе святочнасць. На ягоную думку, "вельмі сімвалічна, што на сваёй гістарычнай зямлі беларусы разам сабраліся і напісалі святыя для кожнага беларуса словы".
У агульнанацыянальным свяце розуму і інтэлекту бралі ўдзел дэпутат літоўскага парламента Вацлаў Станкевіч, гісторык Сяржук Вітушка, дырэктар Віленскага музею імя Івана Луцкевіча Людвіка Кардзіс і іншыя.
Вацлаў Станкевіч вырашыў не здаваць сваёй працы – пакінуў тэкст сабе на памяць. Ён заклікаў беларускіх палітыкаў, чыноўнікаў і грамадства карыстацца сваёй мовай. На думку палітыка, гэта - і будучыня, і незалежнасць Беларусі. Ён падкрэсліў, што без мовы, без культуры, без сваіх каранёў Беларусь не ўтрымае незалежнасці.
Сяржук ГАЎРЫЛЕНКА
