Дзевяць медалёў заваявалі беларусы на 18-м чэмпіянаце Еўропы па армрэслінгу, што праходзіў 23—30 чэрвеня ў нарвежскім горадзе Сарпсборг.

Самы лепшы вынік паказаў Віктар Братчэня з пасёлка Матыкалы Брэсцкага раёна. Ён стаў уладальнікам двух залатых медалёў, адолеў усіх сапернікаў у барацьбе як левай, так і правай рукой. Пра гэта паведаміў сам спартсмен, які ноччу 2 ліпеня вярнуўся ў Брэст з еўрапейскага чэмпіянату.

Віктар Братчэня выступаў у вагавай катэгорыі 75 кг сярод спартсменаў з абмежаванымі фізічнымі магчымасцямі. На аналагічных леташніх спаборніцтвах ён атрымаў залаты і сярэбраны медалі. Цяпер ён будзе рыхтавацца да чэмпіянату свету, які пройдзе 1—7 снежня ў Канадзе.

Паводле слоў В.Братчэні, сярод юніёраў золата і серабро ў Дзмітрыя Рабцава, сярод ветэранаў серабро і бронза ў Юрыя Іванова, у мужчын уладальнікам двух сярэбраных медалёў стаў Павел Палтаран, сярэбранага — Дзмітрый Шмыко.

У 18-м чэмпіянаце Еўропы па армспорце ў Нарвегіі бралі ўдзел прыкладна 500 спартсменаў з 24 краін, паведамляе БелаПАН.