Камуністы праўладнай КПБ і апазіцыйнай ПКБ усклалі вянок ды кветкі да помніка правадыру рэвалюцыі і правялі ля п’едэсталу невялічкія мітынгі. Мерапрыемствы былі несанкцыянаванымі.

“Правільныя” камуністы пра замову падобных акцыяў і не думаюць, а “калякінцы” аніякага адказу з гарвыканкама на сваю заяву так і не атрымалі. Міліцыянты падыйшлі, але, натыкнуўшыся на сяброў КПБ, вырашылі, што ўсё як мае быць. Разам у гэтай акцыі ўдзельнічала 25 чалавек – прыкладна з абодвух бакоў пароўну.

Афіцыйныя мерапрыемствы таксама шматлюднымі не былі. Мясцовыя ўлады адчынілі Дошку гонару. На плошчы Свабоды арганізавалі традыцыйны кірмаш.

Гітом свята сталася адкрыццё сезону ў Летнім амфітэатры. Са сваёй праграмай выступіў тэатр галоўнай спявачкі краіны, “твару Беларусі” Ірыны Дарафеевай. Разам з ёй у першым канцэрце сезона, які стаў першым у межах агульнарэспубліканскай грамадска-культурніцкай акцыі “Мы – беларусы”, прынялі удзел Георгій Калдун, Іван Буслай ды Алена Ланская. Ажыятажу, каб трапіць на гэтае відовішча, не было. Збалаваная віцебская публіка ашчаджае рэсурсы на больш знаных “зорак”.

Алена ГРЫНЯВІЦКАЯ