Беларускія выбары адбываліся і ў Польшчы



Выбарчыя ўчасткі працавалі ў беларускім пасольстве ў Варшаве, а таксама ў консульствах у Беластоку, Гданьску і Белай-Падляскай. Усе яны прыпісаныя да Купалаўскай выбарчай акругі.

dscf5622

Старшыня выбарчай камісіі ў Варшаве Ігар Сякрэта кажа, што непасрэдна падчас галасавання да базавага спісу выбаршчыкаў, у які папярэдне былі ўнесеныя беларусы, якія стала жывуць у Польшчы і стаяць на консульскім уліку, дадаецца яшчэ адзін спіс.

– Тыя людзі, якія часова знаходзяцца на тэрыторыі Польшчы, маглі прыйсці да нас. Перад тым, як прагаласаваць, старшыня камісіі і ягоны намеснік правяраюць ці гэты грамадзянін не прагаласаваў ужо ў Рэспубліцы Беларусь. Правяраецца гэта шляхам кантактаў з выбарчай камісіяй таго ўчастка, да якога ён прыпісаны як жыхар Рэспублікі Беларусь.

Камісія не можа ацаніць працэнт яўкі на сваім участку, таму што невядома, колькі людзей дадаецца ў спісы:

– Я проста прыйшла. Мяне ў спісах не было, таму мне вельмі дзіўна, што мне паверылі на слова, хоць гэта вельмі сур’ёзныя выбары.

РР: Яны не тэлефанавалі ў Беларусь, не правяралі па электронных сродках?

– Яны мне проста паверылі на слова і запісалі мяне ў спіс.

– Мне далі бюлетэнь і сказалі, што я магу прагаласаваць толькі адзін раз. З пашпарта запісалі мае дадзеныя аб прапісцы, каб паведаміць у раённую камісію, што я ўжо прагаласавала тут.

Старшыня камісіі зазначыў, што выбаршчыкаў папярэджваюць, што дазволена галасаваць толькі адзін раз, і што адказнасць за магчымыя парушэнні будзе ляжаць на грамадзянах.

Назіральнікаў на Варшаўскім выбарчым участку няма.

dscf5623

dscf5624

dscf5628

dscf5627

Станіслаў Раманчук, Беларускае Радыё Рацыя, Варшава

Фота аўтара