Лукашэнка: Наступны год будзе вельмі складаным



„Наступны год будзе вельмі складаным, адважуся заўважыць, што такога года ў гісторыі нашай краіны не было”, — заявіў Аляксандр Лукашэнка падчас кадравых прызначэнняў 22 снежня.

„Абвалілася Расея, што творыцца ва Украіне (а гэта — наш другі рынак), Казахстан прасеў. І нам трэба проста выстаяць. І калі мы будзем працаваць, не рэагуючы на людзей, іх прапановы, заўвагі, не падтрымліваючы іх, а ствараючы сваё матэрыяльнае становішча, то такая ўлада народу не патрэбная”, — цытуе Лукашэнку яго прэс-служба.

Асаблівую ўвагу ён надаў пытанням дысцыпліны. „Без дысцыпліны і парадку нічога не зробіце. Не будзе жалезнага парадку, толку не будзе”, — заявіў кіраўнік дзяржавы, звяртаючыся да новапрызначаных чыноўнікаў мясцовай вертыкалі.

„І яшчэ адно якраз надзённае пытанне, якое мяне хвалюе: вельмі шмат падначаленых, прыйшоўшы на гэтую пасаду (хаця я вас папярэджваю, што вы на перадавой, твар у твар з людзьмі) пачынаюць паляпшаць свае жыллёвыя ўмовы. Я не супраць, але — за ваш уласны кошт”, — падкрэсліў Лукашэнка.

„Калі вы ідзяце на гэтую пасаду, вы павінны ведаць, што вы, як на шкле, прасвечваецеся з усіх бакоў, і людзі вас бачаць”, — сказаў ён, дадаўшы, што „вельмі шмат старшыняў райвыканкамаў на гэтым пагарэлі”.

Лукашэнка папярэдзіў, што да прадстаўнікоў улады будуць ставіцца  „самыя высокія патрабаванні”. Паводле яго слоў, у рабоце чыноўнікаў самым галоўным павінны быць інтарэсы людзей. „Людзі павінны мець магчымасць працаваць і зарабляць”, — заявіў ён.

Як паведамлялася раней, 22 снежня прызначаныя новыя: памочнік прэзідэнта — галоўны інспектар па Віцебскай вобласці; пасол Беларусі ў Італіі; пракурор Берасцейскай вобласці; намеснік міністра па падатках і зборах; дырэктар дэпартамента дзяржаўнай інспекцыі працы Міністэрства працы і сацыяльнай абароны; намеснік старшыні Дзяржкамітэта па стандартызацыі — дырэктар дэпартамента па энергаэфектыўнасці.

Лукашэнка таксама даў згоду на прызначэнне 12 старшыняў райвыканкамаў, двух намеснікаў аблвыканкамаў і трох членаў аблвыканкамаў.

belapan.by