Восем еўрапейскіх краін знялі санкцыі з Беларусі



Восем еўрапейскіх краін, якія не ўваходзяць у ЕЗ, паводле прыкладу Еўразвяза знялі санкцыі са 170 беларускіх чыноўнікаў і трох кампаній.

„Краіны — кандыдаты на ўступленне ў ЕЗ — Македонія, Чарнагорыя, Сербія і Албанія, патэнцыйны кандыдат Боснія і Герцагавіна, а таксама Ісландыя, Ліхтэнштэйн і Нарвегія далучаюцца да рашэння Савета ЕЗ. ЕЗ прымае да ведама і вітае гэтую прыхільнасць”, — цытуе ТАСС заяву кіраўніка Еўрапейскай службы знешніх дзеянняў Федэрыкі Магерыні.Згодна з паведамленнем інфармагенцтва, заява была распаўсюджаная 15 красавіка ў Бруселі, але пакуль афіцыйна не апублікаваная.

Да санкцый ЕЗ у дачыненні да Беларусі восем названых краін далучыліся ў 2012 годзе.

15 лютага гэтага года Савет міністраў замежных спраў краін ЕЗ на пасяджэнні ў Бруселі не працягнуў дзеянне санкцый у дачыненні да 170 беларускіх фізічных асоб і трох кампаній. У афіцыйным паведамленні адзначалася, што савет цэніць крокі, зробленыя Мінскам за апошнія два гады для паляпшэння адносінаў з ЕЗ (актыўны ўдзел краіны ва Усходнім партнёрстве і прамежкавай фазе „Еўрапейскага дыялогу аб мадэрнізацыі”, аднаўленне дыялогу па правах чалавека, пачатак перамоў па пагадненнях аб спрашчэнні візавага рэжыму і аб рэадмісіі, падпісанне пагаднення аб супрацоўніцтве па механізме ранняга папярэджання ў энергетычнай галіне), а таксама цэніць „канструктыўную ролю Беларусі ў рэгіёне”.

Разам з тым, ЕЗ па-ранейшаму занепакоены сітуацыяй з правамі чалавека ў Беларусі і зноў нагадвае, што „адносіны Беларусі і ЕЗ павінны грунтавацца на агульных каштоўнасцях, асабліва гэта тычыцца павагі правоў чалавека, дэмакратыі і вяршэнства закону”, падкрэслівалася ў паведамленні.

Пад дзеяннем візавых і эканамічных санкцый на сённяшні дзень застаюцца чацвёра грамадзян, якіх ЕЗ лічыць датычнымі да знікненняў палітыкаў у 1999—2000 гадах: Уладзімір Навумаў (былы міністр унутраных спраў), Віктар Шэйман (былы кіраўнік Адміністрацыі прэзідэнта), Юрый Сівакоў (у перыяд знікнення палітыкаў займаў пасаду кіраўніка МУС) і Дзмітрый Паўлічэнка (камандзір брыгады спецназу ўнутраных войскаў МУС). ЕЗ таксама захаваў эмбарга на пастаўкі ўзбраенняў.

belapan.by