“Афрыкарыум” – трапічная частка Уроцлава



Не так даўно – у кастрычніку 2014 году – сталіца Дольнашлёнскага ваяводства займела ўласны “Афрыкарыум” – збудаванне, дзе ў вялізных акварыумах размешчаны насельнікі трапічных мораў і акіяну. Размешчаны акеанарыум на тэрыторыі мясцовага заапарка і здалёк нагадвае вялікі ангар. Непадалёк яго “пасвіцца” цэлы статак жырафаў, а з іншага боку да “Афрыкарыума” прымыкае адкрыты басейн з камянямі і некаторымі відамі птушак.

У сярэдзіне наведнікаў чакае разнастайны і дзівосны свет марскіх жыхароў – чарапах і скатаў, ламанцінаў і стракатых рознакаляровых рыбак, пінгвінаў і акулаў, асобны басейн адведзены сямейству гіпапатамаў. Акрамя прадстаўнікоў жывёльнага свету тут можна паглядзець і розныя віды трапічнай флоры.

Уладзімір Хільмановіч, Беларускае Радыё Рацыя