Беларусь першая з краін СНД акрэдытавана на пастаўку ялавічыны ў Кітай



Беларусь першая ў СНД і 13-я ў свеце атрымала акрэдытацыю на пастаўку ялавічыны на рынак КНР, паведамілі ў пасольстве Беларусі ў Кітаі.

„Па выніках праведзенай 12 снежня ў Пекіне сустрэчы міністра сельскай гаспадаркі і харчавання Беларусі Леаніда Зайца і кіраўніка галоўнага дзяржаўнага ўпраўлення КНР па кантролі якасці, інспекцыі і каранціне Чжы Шупіна аб’яўлена, што два беларускія мясаперапрацоўчыя заводы – ААТ „Велес-Міт” і ААТ „Магілёўскі мясакамбінат” – атрымалі дазволы на пастаўку ялавічыны ў Кітайскую Народную Рэспубліку”, – расказалі ў дыпмісіі.

Як адзначыў на перагаворах кітайскі бок, гэты вынік стаў магчымы дзякуючы зладжанай рабоце Мінсельгасхарча, пасольства Беларусі ў Кітаі, а таксама кітайскіх спецыялістаў у сферы харчовай бяспекі. Цяпер Кітай з’яўляецца буйнейшым у свеце імпарцёрам ялавічыны, у прыватнасці, у мінулым годзе на кітайскі рынак яе пастаўлена на $2,6 млрд.

Акрамя таго, па выніках перагавораў было анансавана хуткае завяршэнне працэсу допуску вядучых беларускіх вытворцаў мяса птушкі на кітайскі рынак.

Цяперашні візіт у Кітай міністра сельскай гаспадаркі і харчавання Беларусі прызначаны стымуляваць далейшае развіццё гандлю сельгаспрадукцыяй паміж дзвюма краінамі. У пасольстве таксама расказалі, што 11 снежня адбылася сустрэча з кіраўніцтвам Міністэрства сельскай гаспадаркі Кітая, на якой падпісаны план супрацоўніцтва паміж двума міністэрствамі да 2020 года.

У мэтах пашырэння аб’ёмаў паставак беларускай прадукцыі на кітайскі рынак Леанід Заяц сустрэўся са старшынёй праўлення буйнейшай у Кітаі харчовай карпарацыі COFCO Чжаа Шуанлянам, па выніках сустрэчы дасягнуты шэраг дамоўленасцей.

У час візіту беларускай дэлегацыі ў Кітай запланавана таксама правядзенне 13 снежня ў Гуанчжоу маштабнага сельскагаспадарчага форуму „Зроблена ў Беларусi”, дзе будуць прадстаўлены буйнейшыя вытворцы харчовай прадукцыі нашай краіны.

belta.by