Беларуска-малдаўскія тралейбусы плануюць пастаўляць у Еўразвяз
Беларуска-малдаўскія тралейбусы плануюць пастаўляць у Еўразвяз. Аб гэтым прэм’ер-міністр Малдовы Павел Філіп заявіў 19 красавіка журналістам па выніках перагавораў з кіраўніком Беларусі Аляксандрам Лукашэнкам.
Павел Філіп адзначыў, што ў Кішынёве паспяхова функцыянуе сумеснае прадпрыемства па зборцы беларускіх тралейбусаў. У Малдове хочуць не толькі забяспечыць патрэбнасці сваіх гарадоў у гэтым транспарце, але і пастаўляць іх у еўрапейскія краіны.
„Гэты прадукт, выраблены ў Малдове, але з беларускімі каранямі, мы можам экспартаваць без мытных збораў на рынак Еўрапейскага звяза”, – сказаў Павел Філіп.
Малдова таксама прадоўжыць закупляць беларускія аўтобусы, у перспектыве плануецца адкрыць іх вытворчасць тут.
Кіраўнік Беларусі лічыць неабходным развіваць у Малдове ўжо існуючыя вытворчасці і адкрываць новыя. Напрыклад, у краіне ўжо збіраюць беларускія трактары. Лінейку гэтай прадукцыі можна пашырыць за кошт запуску вытворчасці невялікай тэхнікі, якая выкарыстоўваецца ў невялікіх або прыватных гаспадарках.
Беларускія прадпрыемствы гатовы пачаць і дарожнае будаўніцтва ў Малдове. Яны ўжо ўдзельнічаюць у адпаведных тэндарах. Кіраўнік дзяржавы запэўніў малдаўскі бок, што ў дарог, пабудаваных беларускімі спецыялістамі, высокая якасць і тэрмін эксплуатацыі некалькі дзясяткаў гадоў.
Малдове акажуць падтрымку ў адкрыцці новых перапрацоўчых вытворчасцей у Беларусі, каб у далейшым прадукцыя пастаўлялася на рынкі трэціх краін. „Прыязджайце, мы вам акажам адпаведную падтрымку. Прычым можаце не перажываць наконт нейкага жульніцтва, што вас хто-небудзь падмане. Гэтага ў Беларусі няма і быць не можа. Мы трымаем гэта на строгім кантролі”, – падкрэсліў Аляксандр Лукашэнка.
