ЕБРР прадае польскай кампаніі свае акцыі ў сетцы магазінаў „Буслік”
Еўрапейскі банк рэканструкцыі і развіцця прыняў рашэнне аб продажы свайго пакета акцый — 25,5% — у ТАА „WOU” (сетка магазінаў „Буслік”) стратэгічнаму інвестару — польскай кампаніі CDRL, якая займаецца распрацоўкай, вытворчасцю і дыстрыбуцыяй дзіцячага адзення.
У выніку здзелкі ЕБРР прадае 22,95% сваіх акцый кампаніі CDRL, а 2,55% — генеральнаму дырэктару і мінарытарнаму акцыянеру сеткі „Буслік”, паведаміла БелаПАН прэс-служба банка.
За дзевяцігадовае супрацоўніцтва з ЕБРР сетка магазінаў тавараў для дзяцей „Буслік” павялічылася больш як у пяць разоў: з васьмі крам у 2009-м да 46 у 2018 годзе. Быў ажыццёўлены поўны комплекс стратэгічных задач, які ўключаў: павелічэнне долі рынку кампаніі да 15%, экспансію ва ўсе рэгіёны Беларусі, укараненне прынцыпаў карпаратыўнага кіравання, стварэнне савета дырэктараў і ўкараненне міжнародных стандартаў фінансавай справаздачнасці.
„Гандлёвая сетка” Буслік „стала найбуйнейшай сеткай тавараў для дзяцей у Беларусі, і яе далейшае развіццё будзе падтрымліваць стратэгічны профільны інвестар CDRL. Гэта сведчыць пра цікавасць міжнароднага бізнесу да беларускіх кампаній і рост прывабнасці Беларусі для інвестараў”, — адзначаецца ў паведамленні ЕБРР.
З пачатку сваёй дзейнасці ў Беларусі ў 1992 годзе ЕБРР інвеставаў больш за 2,4 млрд еўра ў 115 праектаў у розных галінах эканомікі краіны.
belapan.by