Каля 95 працэнтаў экспарту паслуг з Беларусі ў ЗША – у сферы ІТ



Амаль 95 працэнтаў у агульным аб’ёме экспарту паслуг з Беларусі ў ЗША складаюць IT-паслугі. Аб гэтым заявіў 13 ліпеня журналістам часовы павераны ў справах Беларусі ў ЗША Павел Шыдлоўскі.

Паводле слоў Паўла Шыдлоўскага, у 2016 годзе Беларусь экспартавала ў ЗША паслугі на суму амаль $400 млн. У бягучым годзе Беларусь разлічвае павялічыць экспарт паслуг у гэту краіну на 20 працэнтаў.

Паводле яго слоў, на амерыканскі рынак IT-паслуг выходзіць усё большая колькасць беларускіх кампаній. „Агульная тэндэнцыя ў тым, што гэтыя кампаніі працуюць больш у напрамку стварэння ўласнага праграмнага прадукту, а не ў сферы аўтсорсінгу”, – звярнуў увагу Павел Шыдлоўскі.

У гэтым годзе ў Маямі была прадстаўлена нацыянальная экспазіцыя Беларусі. І амерыканскія кампаніі, дзелавая супольнасць, кіраўніцтва вядучых універсітэтаў рэгіёна праявілі цікавасць да наладжвання супрацоўніцтва з Беларуссю менавіта ў ІТ-сферы, дадаў ён.

Адзначаецца таксама пазітыўная дынаміка экспарту беларускіх тавараў. За 5 месяцаў ён павялічыўся ў 2,5 раза амаль да $80 млн.

belta.by