Леанід Судаленка: Правесці афіцыйна страйк практычна немагчыма



Прававы інспектар прафсаюза РЭП Ленаід Судаленка распавёў пра тое, як на некаторых працоўных пачалі аказваць ціск за актыўную грамадзянскую пазіцыю.

Леанід Судаленка: На “Гамсельмашы” людзей звальнялі за ўдзел у страйку, і я прадстаўляў у судзе іх інтарэсы. І, трэба сказаць, што некаторых аднаўлялі на працы і выплочвалі неабходную суму кампенсацыі за вымушаны прагул.

Увогуле, па беларускім заканадаўстве правесці афіцыйна страйк практычна немагчыма.

РР: Вельмі складаная працэдура?

Леанід Судаленка: Так, бо трэба папярэдне прагаласаваць, атрымаць згоду больш за палову калектыву, правесці перамовы з наймальнікам.

Уявіце сабе такую сітуацыю – страйкуюць работнікі авіякампаніі “Люфтганза”, якія патрабуюць ад наймальніка падвышэння заробкаў. І гэта дазволена.

А ў Беларусі палітычныя страйкі ў любым выпадку будуць па-за законам. Такі страйк на прадпрыемстве практычна немагчыма правесці, паколькі Працоўны кодэкс называе страйк спрэчкай, якая ўзнікла паміж наймальнікам і працоўнымі. Але апошнія, як бачым, таксама не застаюцца ў баку ад падзей, якія адбываюцца ў краіне.

Кастусь Заблоцкі, Беларускае Радыё Рацыя