Нацбанк зніжае стаўку рэфінансавання



Стаўка рэфінансавання 19 лютага будзе зніжаная з 9 да 8,75% гадавых. Такое рашэнне 12 лютага прыняло праўленне Нацыянальнага банка Беларусі.

Як паведамляе прэс-служба рэгулятара, 19 лютага таксама будзе зніжаная стаўка па крэдыце авернайт з 10 да 9,75% гадавых і стаўка па дэпазіце авернайт — з 8 да 7,75%.

Абгрунтаванне прынятага рашэння кіраўніцтва Нацбанка плануе апублікаваць у другой палове дня падчас прэс-брыфінгу.

Чарговае пасяджэнне праўлення Нацбанка, на якім будзе разглядацца пытанне аб стаўцы рэфінансавання, запланаванае на 13 мая 2020 года.

Папярэдні раз Нацбанк зніжаў стаўку рэфінансавання ў лістападзе з 9,5% да 9% гадавых, а раней — у жніўні з 10 да 9,5% гадавых. Да гэтага на працягу года рэгулятар адкладваў зніжэнне стаўкі рэфінансавання, абгрунтоўваючы такое рашэнне некаторым паскарэннем інфляцыйных працэсаў у краіне.

Замежныя аналітыкі раней прагназавалі, што беларускія ўлады будуць працягваць зніжаць стаўку рэфінансавання ў 2020 годзе. У прыватнасці эканамісты „Ашчадбанка” раней меркавалі, што Нацыянальны банк Беларусі ў 2020 годзе можа працягнуць практыку зніжэння стаўкі рэфінансавання „ў выпадку адсутнасці знешніх шокаў”.

Як зазначаў у лістападзе старшыня праўлення Нацбанка Павел Калаур, каментуючы перспектывы змянення стаўкі рэфінансавання ў 2020 годзе, дынаміка будзе залежаць ад сітуацыі на спажывецкім рынку.

„У наступным пры прыняцці рашэнняў па грашова-крэдытнай палітыцы праўленне Нацыянальнага банка працягне ўлічваць увесь комплекс знешніх і ўнутраных умоў, у першую чаргу фактычную і чаканую дынаміку інфляцыі ў параўнанні з мэтавым арыенцірам, а таксама ступенню рэалізацыі названых вышэй праінфляцыйных рызык”, — сказаў Калаур.

Пры гэтым ён зазначыў, што Нацбанк пакуль не бачыць сур’ёзных пагроз для цэнавай і фінансавай стабільнасці ў будучым годзе. Згодна з афіцыйным прагнозам рэгулятара, у 2020 годзе інфляцыя не павінна перавысіць 5%.

БелаПАН