Улады Беларусі засакрэцілі звесткі пра ліміт эмісіі аблігацый Банка развіцця



Урад і Нацбанк Беларусі засакрэцілі ліміт эмісіі аблігацый, усталяваны для Банка развіцця, вынікае з сумеснай пастановы №447/9 ад 30 ліпеня 2021 года.

„Для службовага карыстання”, — абвяшчае першы пункт пастановы з назвай «Аб аблігацыях адкрытага акцыянернага таварыства „Банк развіцця Рэспублікі Беларусь”, паведамляе АФН.

Літаральна напачатку чэрвеня ўлады павялічылі ліміт эмісіі аблігацый банка з 570 да 1665 млн. рублёў. Праз 2 месяцы ўлады, нескладана здагадацца, зноў павысілі ліміт, але на гэты раз засакрэцілі лічбу.

Схема з эмісіяй аблігацый Банка развіцця, піша АФН, па сваёй сутнасці з’яўляецца ўзаконенай дзяржавай фінансавай пірамідай, што ўласна і ёсць прычынай кантролю над аб’ёмам гэтых папер. За кошт прыцягнутых пад аблігацыі грашовых сродкаў Банк развіцця выдае не толькі дырэктыўныя крэдыты, але і фінансуе праекты ў рамках прынятых дзяржпраграм, даручэнняў і ўказаў Лукашэнкі, а таксама выдае экспартныя крэдыты.

Прычынай засакрэчвання згаданага пункта пастановы можа быць як рэзкае павышэнне ліміту, так і адмена максімальнага абмежавання як такога, што дазволіць фінансавай бурбалцы раздзьмуцца да неймаверных дагэтуль памераў, лічыць фінансавае агенцтва.