Улады хочуць падвысіць стаўкі акцызаў на ўсе падакцызныя тавары



У 2018 годзе ў Беларусі плануецца падвысіць стаўкі акцызаў на ўсе падакцызныя тавары. Адпаведныя змены прадугледжвае законапраект аб унясенні зменаў у Падатковы кодэкс, які апублікавала Міністэрства фінансаў.

Так, стаўкі акцызаў на тытунёвую прадукцыю вырастуць (у залежнасці ад цэнавага сегмента цыгарэт) на 11—15%.

Таксама дакумент прадугледжвае павышэнне ставак акцызаў на аўтамабільнае паліва. У прыватнасці, на маторнае паліва стаўка акцызу будзе павышаная на 10%. Стаўка акцызу на аўтамабільны бензін, не адпаведны класу 5, вырасце з бягучых 527,37 рубля да 580,11 рубля за тону, на бензін класа 5 — з 306,17 да 336,79 рубля за тону.

У той жа час стаўкі акцызу на дызельнае паліва, якое не адпавядае класу 5, дзяржава мае намер падвысіць з цяперашніх 226,73 рубля да 249,4 рубля за тону, на дызпаліва класа 5 — з 167,67 да 184,44 рубля, на дызель з метылавага эфіру тлустых кіслот — з 38,6 да 42,46 рубля.

Акрамя гэтага, у 2018 годзе плануецца павысіць стаўкі акцызаў на алкагольную прадукцыю. На піва стаўка акцызу вырасце з 35 да 36 капеек на літр гатовай прадукцыі. У той жа час на моцны алкаголь дзяржава збіраецца павялічыць стаўку акцызу з цяперашніх 13,45 да 13,92 рубля за літр бязводнага этылавага спірту, які змяшчаецца ў гатовай прадукцыі; на пладовыя віны — з 11,07 да 11,46 рубля, на слабаалкагольныя напоі — з 10,47 да 11,2 рубля, на віны натуральныя — з 80 да 86 капеек.

Акцызы з’яўляюцца адной з асноўных крыніц напаўнення беларускай казны.

Як паведамлялася, бюджэт на 2017 год прадугледжвае, што за кошт акцызаў паступленні складуць 2,2 млрд рублёў (больш за 1 млрд долараў). За студзень—красавік 2017 года акцызы прынеслі ў казну каля 700 млн рублёў, іх доля ў сукупных даходах кансалідаванага бюджэту склала каля 7%.

На акцызы ад рэалізацыі алкагольнай прадукцыі прыпадае прыкладна траціна паступленняў ад акцызаў, якiя залiчваюцца ў бюджэт.

belapan.by

Фота Tut.by

[manual_related_posts]