Алексіевіч гатовая аплаціць камуналку жанчыны-інваліда



Лаўрэат Нобелеўскай прэміі па літаратуры Святлана Алексіевіч гатовая аплаціць даўгі па камунальных плацяжах інваліда з Гомеля Наталлі Васіленкі, якой пагражаюць высяленнем на вуліцу.

Пра гэта паведаміў БелаПАН грамадскі актывіст Уладзімір Кацора пасля размовы з пісьменніцай. Алексіевіч зараз знаходзіцца за мяжой.

„Я два гады ўжо спрабую арганізаваць сустрэчу нобелеўскага лаўрэата з гамяльчанамі, і таму знаходжуся ў кантакце са Святланай Алексіевіч, — расказаў Кацора. — Яна даведалася са СМІ аб праблемах Наталлі Васіленкі і гатовая ёй дапамагчы, толькі прасіла ўдакладніць дэталі — суму запазычанасці, нумар рахунку і гэтак далей. Зараз пісьменніца у ад’ездзе, але да канца месяца вернецца ў Беларусь”.

11 мая суд Савецкага раёна Гомеля пачаў разглядаць іск камунальнага жыллёвага рамонтна-эксплуатацыйнага ўнітарнага прадпрыемства „Савецкае” да 41-гадовай Васіленкі. З-за запазычанасці па камунальных плацяжах жанчыну хочуць выселіць з арэнднага пакоя плошчай 17 квадратных метраў без давання жылля — фактычна на вуліцу.

У адказчыцы цяжкая жыццёвая сітуацыя — трэцяя рабочая група інваліднасці, эпілепсія, павышаны ціск, парок сэрца, інсульт, праблемы з ныркамі, адсутнасць сваякоў, працы і запазычанасць за камунальныя плацяжы. З-за хвароб і мноства заканадаўчых абмежаванняў Васіленка доўгі час не можа ўладкавацца на працу, а зараз можа пазбавіцца апошняга — пакоя ў кватэры. У гэтай кватэры жанчына жыве з 1976 года, яе блізкія сваякі памерлі. Два пакоі прыватызавала стрыечная сястра з мужам, у трэцяй жыве Наталля.

Раней Васіленка працавала ў будаўнічай арганізацыі, але ў 2011 годзе ў яе раптоўна пачалася эпілепсія. Урачы паставілі дыягназ і напісалі спіс абмежаванняў па працы, але трэцюю групу інваліднасці далі толькі ў 2014 годзе. Уладкавацца на працу з абмежаваннямі практычна немагчыма. Наталлю не ўзялі нават перабіраць гародніну, куды яе накіроўвалі ад біржы працы, яна не прайшла медыцынскую камісію. У 2016 годзе ў Васіленкі здарыўся інсульт.

На сённяшні дзень жанчына атрымлівае пенсію, з якой 40% ідзе на пагашэнне крэдыту — яго яна брала на спажывецкія патрэбныя, калі яшчэ працавала. У выніку на рукі Васіленка атрымлівае ўсяго 75 рублёў.

У судзе прадстаўнік КЖРЭУП „Савецкае” пацвердзіў патрабаванні: скасаваць дагавор найму жылога памяшкання, выселіць Наталлю без давання іншага жылля. Яе запазычанасць па камунальных плацяжу складае 375 рублёў, пеня — больш за 500 рублёў. Усяго 911 рублёў і 7 капеек доўгу.

Пасля артыкулаў аб Наталлі ў інтэрнэт-газеце Naviny.by многія прапанавалі ёй дапамогу. Васіленка ўдзячная ўсім, хто адгукнуўся на яе бяду, дапамог матэрыяльна і маральна. „Сёння таксама працягваюць тэлефанаваць людзі, прапануюць дапамогу. Адна жанчына пералічыла сур’ёзную суму грошай, але прасіла, каб я зрасходавала гэтыя грошы не на камуналку, а на асабістыя патрэбы. Мне вельмі патрэбныя цяпер лекі, і дзякуючы ёй я купіла іх”, — расказала Наталля.

Прапанову дапамогі ад Алексіевіч яна ўспрымае „як казку, нешта незямное, нерэальнае”. „Тым больш, яна мая любімая пісьменніца, бо піша вельмі рэалістычна і праўдзіва. У мяне захоўваецца яе кніга „У вайны не жаночы твар” 1985 года выдання — гэта мая любімая кніга, я люблю кнігі пра вайну, пра партызанскі рух у Беларусі. Няма слоў, каб выказаць маю ўдзячнасць”, — сказала Васіленка.

Слуханне справы па іску КЖРЭУП „Савецкае” да Васіленкі працягнецца ў судзе Савецкага раёна Гомеля 22 мая.