„Білі зверху па спіне і галаве, пакуль не страціў прытомнасць”



38-гадовы Дзяніс Луцко з Баранавіч чацвёрты раз выкліканы на допыт у Следчы камітэт. Хаця скаргу на беспадстаўнае збіццё АМАПам падаў яшчэ ў другой палове жніўня.

У ноч з 9-га на 10-е жніўня Дзяніс трапіў, як кажуць, “пад раздачу” выпадкова. Яго збілі АМАПаўцы недалёка ад дома, калі вяртаўся з вандроўкі роварыстаў, успамінае  Дзяніс Луцко:

– Падляцелі ззаду людзі ў чорных скафандрах і пачалі біць. Першы ўдар быў па нагах, адпаведна, я адразу стаў на калені. Нахілілі галавой да зямлі, закруцілі рукі і білі зверху па спіне, па галаве. Пасля гэтага я “ад’ехаў”.

Паводле Дзяніса, збіццё яго і іншых затрыманых працягнулася і ў аўтазаку. Карціна была як у фільме жахаў: хто мог хоць неяк трымацца, той стаяў на каленях збакоў, хто быў без прытомнасці, ляжалі як мяхі, адзін на адным ў цэнтры. Але і гэта быў яшчэ не канец здзекаў:

– У следчым ізалятары, калі нас прывезлі, на вуліцы білі нагамі. Быў калідор, супрацоўнікі стаялі ў два рады і крычалі з мацернымі словамі: тварамі ўніз, да зямлі, бягом! Хто мог бегчы, той бег і атрымліваў менш, а хто не мог – як я, бо ў мяне балелі ног, то ішоў павольна,  і я “адгроб” як мае быць. У следчым ізалятары яны стаялі па абодвы бакі калідора, білі нагамі і дубінкамі.

Пасля выхаду з СІЗА-6 у Дзяніса некаторы час трэсліся рукі. Разбіты АМАПаўцамі тэлефон аднаўляў за свае сродкі ў Менску. Дарагі ровар, які ўвесь час быў у міліцыі, прыйшлося шукаць самому. Марна спрабаваў апратэставаць рашэнне Баранавіцкага суда ў Берасцейскім абласным судзе. Следчы камітэт, лічыць Луцко, справу зацягвае наўмысна.

Беларускае Радыё Рацыя