Дэлегацыя Руху Салідарнасці „Разам” ушанавала памяць Ларысы Геніюш
9 жніўня 1910 года нарадзілася вялікая беларуска Ларыса Геніюш.
9 жніўня ў Зэльву разам з намеснікам старшыні партыі БНФ Ігарам Ляльковым прыехала нешматлікая дэлегацыя Руху Салідарнасці „Разам” – Вячаслаў Сіўчык, Вікенцій Кавалькоў і Міхась Васілеўскі.
Ларыса Геніюш – апостал беларускай нацыі – была шчырай хрысціянкай. Таму дэлегацыя з Менска накіравалася да праваслаўнай царквы, побач з якой знаходзіцца помнік Ларысе Антонаўне, дзе былі ўскладзены кветкі і запалены знічкі.
Пасля гэтага дэлегацыя накіравалася да месца апошняга спачыну Ларысы і Івана Геніюш, дзе хвілінай маўчання ўшанавала памяць вялікай беларускай паэткі. Адбылася кароткая памінальная служба.
[Not a valid template]
Стваральнік Руху Салідарнасці „Разам” Вячаслаў Сіўчык даў сціслы каментар: „Я вельмі ўсцешаны, што гэтая паездка адбылася. Для мяне Ларыса Геніюш – беларуская святая.
Беларуска, якая прадэманстравала неверагодную мужнасць, бо пранесла ідэалы Беларускай Народнай Рэспублікі праз усё сваё жыццё і прынцыпова адмовілася ад савецкага грамадзянства. Такую мужнасць, якой не хапала беларускім мужчынам. Мужнасць быць грамадзянкай БНР.
Ларыса Геніюш – асоба, якую не зламалі лагеры ГУЛАГа, якую паважаюць прадстаўнікі ўсіх народаў, што зведалі камуністычныя рэпрэсіі. Вялікая беларуская паэтка, знакамітыя радкі якой „Як жыць, дык жыць для Беларусі, а без яе – зусім не жыць!” мусяць дапамагчы выжыць нашай краіне і нашай нацыі.”
„Для нас вельмі важна было, каб над магілай вялікай беларускі сёння прагучала нашае спрадвечнае: „Жыве Беларусь!”, кажа Вячаслаў Сіўчык.
Паводле прэсавай службы Руху Салідарнасці „Разам”
Глядзіце таксама
