Экс-баец украінскага „Беркута” служыць у менскім АМАПе



Экс-байцы ўкраінскага спецаддзела „Беркут” цяпер на службе ў міліцыі Беларусі. Шляхам журналісцкага расследвання беларуская служба сайта „InformNapalm” дакладна выявіла аднаго і ўскосна яшчэ двух „беркутаўцаў”, якія цяпер знаходзяцца на службе ў Беларусі.

Многія „беркутаўцы”  ў мінулым датычныя да супрацьпраўных дзеянняў падчас Рэвалюцыі годнасці. Кажа Дзяніс Івашын, дырэктар службы:

– Гэта сведчыць, перадусім, што Беларусь разам з інфармацыйнай вайной цалкам стала на бок Расеі, таму што яна прымае злачынцаў, якія заангажаваныя ва ўсіх працэсах, якія адбываліся падчас Майдану, у гвалтоўным збіцці людзей, магчыма нават у іх забойстве. Яны зараз  знаходзяцца на тэрыторыі ў тым ліку і Беларусі. Зараз Беларусь у прынцыпе выступае адным фронтам з Расеяй, яна нічым не розніцца ад Расеі.

Пакуль выяўлены толькі былы баец Нікалаеўскага „Беркута” Мікалай Стагарняк, які сведчыў супраць Вячаслава Касінерава, удзельніка акцыі „недармаедаў” у Менску.

Большасць байцоў гэтага спецаддзела, якіх было 4 тысячы, уцяклі ў акупаваны Крым, альбо перайшлі на службу ў Расею.

У Беларусі, як мяркуе журналіст Дзяніс Івашын, на службе ў міліцыі іх можа быць некалькі дзясяткаў. Розьніца палягае толькі ў тым, што “экс-беркутаўцы” ў Беларусі маюць статус працоўных эмігрантаў, а ў Расейскай Федэрацыі яны атрымалі грамадзянства.

Якуб Сушчынскі, Беларускае Радыё Рацыя, Гародня

Фота аўтара