Ігар Казмярчак: У гэтай вайны няма логікі, яна нікому не патрэбная!



Грамадскі актывіст Ігар Казмярчак нарадзіўся ў Воршы, але праз пераслед уладаў Беларусі апынуўся за мяжой. Сёння а 5-й раніцы водгулле выбухаў ён пачуў ва ўкраінскім Чарнігаве.

Ігар Казмярчак

Паводле ягоных назіранняў, украінцы рыхтаваліся да магчымага расейскага ўварвання яшчэ даўно. У Чарнігаве абноўлены ўказальнікі да бомбасховішчаў, дзе-нідзе крыж-накрыж заклеены вокны ў дамах, людзі загадзя запасліся прадуктамі харчавання і лекамі. І тым не менш, сёння ад самага ранку стаяць чэргі да банкаматаў, бо жыхары Чарнігава імкнуцца зняць з картак свае зберажэнні і папоўніць харчовыя запасы.

Хаця імавернасці вайны з Расеяй ніхто не выключаў, але да канца не верылася, што гэта можа здарыцца, кажа Ігар Казмярчак:

– Панікі як такой няма, людзі добразычлівыя, падтрымліваюць адзін аднаго. Але напружанасць адчуваецца. Логіка паказвае, што гэтая вайна нікому не патрэбная. У тым ліку і Пуціну. Але ён яе распачынае, бо відавочна ўжо не карыстаецца логікай. Ен карыстаецца нейкімі алагічнымі рэчамі, кшталту “увяжамся, дык застанемся ў гісторыі”. Не паддаецца гэта  лагічнаму асэнсаванню.

Нягледзячы на тое, што ўдары па тэрыторыі Ўкраіны былі нанесены ў тым ліку і з Беларусі, да простых беларусаў ўкраінцы ставяцца па-ранейшаму прыязна, заўважае Ігар Казмярчак. Але асуджаюць палітыку і Пуціна, і Лукашэнкі.

Беларускае Радыё Рацыя

[manual_related_posts]