Слуханне ў справе экстрадыцыі Аляксея Дрыка чарговы раз адклалі
Варшаўскі акруговы суд чарговы раз перанёс разгляд справы Аляксея Дрыка – беларуса, экстрадыцыі якога дамагаецца афіцыйны Менск.
Беларускія следчыя абвінавачваюць спадара Аляксея ў нясплаце падаткаў. Сам абвінавачаны сваю віну не прызнае і звязвае ціск органаў са сваёй апазіцыйнай актыўнасцю. Пацвярджаюць гэта і сведкі, якія з’явіліся на судзе: Зміцер Гуніч, Алесь Макаеў, Анатоль Міхнавец.
Зрэшты, палітычную матывацыю справы дапускае нават варшаўскі пракурор Дар’юш Слепакура, які з рацыі абавязкаў прадстаўляе абвінаваўчы бок.
– З прадстаўленага суду матэрыялу вынікае, што Аляксей Дрык удзельнічаў у апазіцыйных да цяперашніх улад Беларусі арганізацыях. Таму важна падчас судовай вытворчасці выявіць усе доказы, звязаныя з ягонай апазіцыйнай дзейнасцю.
Аляксей Дрык ужо 3 гады чакае на статус палітуцекача ў Польшчы.
Грамадзянін Беларусі ўпэўнены – справа вырашыцца на яго карысць:
– Суд хоча разгледзець усе абставіны, паслухаць дадаткова сведкаў. Таму слуханне пераносіцца другі раз, каб не было ніякай памылкі. Суддзя займае нейтральную пазіцыю.
РР: Як, на Ваш погляд, справа скончыцца?
Аляксей Дрык: Ведаю, што на маю карысць. Я веру ў гэта.
Чарговае паседжанне ў справе дапушчэння да экстрадыцыі Аляксея Дрыка пройдзе 3 жніўня. Сітуацыю ўважліва маніторыць польская Хельсінкская фундацыя. Яе прадстаўнік у каментары зазначыў, што Беларусь не з’яўляецца дзяржавай права, а таму яны будуць пільна адсочваць, якое рашэнне прымуць польскія ўлады.
Цалкам матэрыял слухайце ў далучаным гукавым файле:
Адам Завальня, Беларускае Радыё Рацыя, Варшава
Фота аўтара
