У Беларусі колькасць пацверджаных выпадкаў COVID-19 перавысіла 48 тысяч



Колькасць пацверджаных выпадкаў каронавіруснай інфекцыі COVID-19 у Беларусі дасягнула 48.630, памерла 269 чалавек, паведаміла Міністэрства аховы здароўя ў сваім тэлеграм-канале.

Такім чынам, за апошнія суткі памерла яшчэ шэсць чалавек, а агульная колькасць выпадкаў COVID-19 павялічылася на 879, або на 1,8% (у папярэднія суткі было 883 новыя выпадкі і чатыры смерці). Міністэрства аховы здароўя традыцыйна падкрэслівае, што памерлі пацыенты „з шэрагам хранічных захворванняў з выяўленай каранавіруснай інфекцыяй”.

Ачунялі і выпісаныя 23.647 пацыентаў (+632 за суткі). Усяго праведзена 622.313 тэстаў на каранавірусную інфекцыю, у тым ліку за мінулыя суткі — 12.642.

Міністэрства аховы здароўя зноў не апублікавала статыстыку захварэлых па абласцях і Мінску, а таксама колькасць хворых, якія знаходзяцца на апаратах штучнай вентыляцыі лёгкіх, і пацыентаў, што маюць патрэбу „ў асаблівай увазе спецыялістаў у сувязі з цяжарам захворвання”. Другі месяц міністэрства не праводзіць прэс-мерапрыемствы.

Як заявіў 6 чэрвеня падчас рабочага візіту ў Магілёў Аляксандр Лукашэнка, „гэта была цяжкая барацьба, якая сёння не скончаная”. „Сітуацыя кіраваная, і краіна кіраваная, і мы можам прыняць любое рашэнне. Але пакуль, дзякуй богу, нам не патрэбныя крайнія меры. Нашы лекары навучыліся спраўляцца з гэтай хваробай. Яна ў кожнага чалавека можа працякаць па-рознаму. Адсюль і лекі патрэбныя розныя. Лекаў у нас хапае, ахоўных сродкаў дастаткова, і ўрачы прыстасаваліся лячыць гэтыя хваробы”, — запэўніў ён.

Лукашэнка падкрэсліў, што ў Беларусі не толькі займаюцца тэставаннем на каранавірус, але і прыярытэтную ўвагу надаюць дыягностыцы пнеўманій. „Мною было дадзенае жорсткае ўказанне: усіх тых, хто звярнуўся, — на КТ. Мы за гэты час закупілі дзясяткі апаратаў і там, дзе трэба было, усталявалі. Зараз нават у Мінску ў паліклініках усталёўваем. Лекары малайцы, ужо навучыліся, яны бачаць на КТ — звычайная пнеўманія або кавідная. Вось гэта правільны паказчык, — сказаў кіраўнік дзяржавы. — І мы можам смела гэтыя паказчыкі апублікаваць і паказаць, хто лепш за ўсё спраўляецца і справіўся на сённяшні момант з гэтай заразай”.

Разам з тым Лукашэнка адзначыў, што неабходна выконваць меры засцярогі, аднак падыходзіць да гэтага з розумам. „Трэба быць вельмі акуратнымі і асцярожнымі і берагчы старых. Не расслабляйцеся, ні ў якім разе. Паберажыце сябе, але разумна. Не зачыняйцеся недзе ў куце, а больш бывайце на свежым паветры”, — параіў беларускі кіраўнік.

5 чэрвеня намеснік міністра аховы здароўя Алена Богдан падчас наведвання Брэсцкай вобласці ў межах рэспубліканскага маніторынгу паведаміла, што пік эпідэміі каранавіруса прайшла амаль палова насельніцтва Беларусі. „Мінск ужо прайшоў верхавіну і ідзе на зніжэнне. Мінская і Віцебская вобласці прайшлі гэтак жа. Гэта значыць фактычна 40—45% насельніцтва рэспублікі гэты этап прайшлі, — цытуе чыноўніцу прэс-служба Міністэрства аховы здароўя. — Калі пройдзе Брэсцкая вобласць, у нас будзе бліжэй да 60%”.

belapan.by

Фота: Reuters