У Берасці згадалі Усеагульную дэкларацыю правоў чалавека



68 гадоў мінае з часу прыняцця Усеагульнай дэкларацыі правоў чалавека. З гэтай нагоды праваабарончая арганізацыя “Берасцейская вясна” правяла круглы стол з удзелам палітыкаў, прадстаўнікоў прафсаюзаў і грамадзянскай супольнасці рэгіёну. Абмяркоўвалі судовыя працэсы за ўдзел у недазволеных уладамі масавых акцыях.

Кажа праваабаронца Уладзімір Малей:

– Пры падачы заявы на правядзенне масавых мерапрыемстваў неабходна прад’яўляць дамовы з міліцыі, з бальніцы, з ЖКГ на аказанне паслуг. Выканаўшы пэўную працу, мы дамагліся, што ў Берасці цяпер разам з заявай неабходна падаць толькі дзве дамовы – з ЖКГ і  з хуткай дапамогай. То бок мы скасавалі патрэбу ў дамовых з міліцыяй.

У час сустрэчы прайшоў прагляд кароткіх фільмаў на тэму абароны правоў чалавека ў Берасці. Прыгадалі пераслед удзельнікаў Свіслацкага фэсту ў гонар паўстанцаў Каліноўскага. У завяршэнне кожны атрымаў брашуру з тэкстам Усеагульнай дэкларацыі правоў чалавека, якая была прынята 10 снежня 1948 году ў Парыжы. За яе прыняццё галасавала і БССР.

Мікола Ляшкевіч, Беларускае Радыё Рацыя

Фота аўтара