У Гародні зладзяць забег барадачоў і вусачоў
Праект “Жывая гісторыя” ў Гародні падрыхтаваў да Дня горада шэраг незвычайных акцый, каб зацікавіць гарадзенцаў і гасцей горада. Адна з іх – гэта забег людзей, якія носяць бароды і вусы. Распавядае кіраўнік праекта “Жывая Гісторыя” Сяргей Іваноў:
– Па-першае, гэта здаровы лад жыцця, па другое, гэта папулярызацыя барады, як такой. Вельмі прыемна бачыць хлопцаў, якія носяць бароды. Хочацца, каб гарадзенцы і госці ведалі, што горад святкуе цудоўную дату 888, таму і метраў у дыстанцыі будзе столькі ж.
Забег барадачоў і вусачоў адбудзецца ў межах святкаванняў Дня горада 14 верасня а 18-й гадзіне. Галоўныя ж святкаванні пройдуць 17 верасня, і пачнуцца са святочнага шэсця ад плошчы Леніна. У гэтым годзе мерапрыемства адбываецца пад дэвізам “Я люблю Гародню”.
Беларускае Радыё Рацыя, Гародня
