У Гародні звольніўся пракурор



У канцы лютага пракурор Дзмітрый Грыцук сышоў з пракуратуры горада Гародні. Ён удзельнічаў у некаторых крымінальных працэсах, якія пачалі пасля выбараў. Напрыклад, ён быў дзяржабвінаваўцам у справе збітага АМАПам таксіста Аляксея Лапы.

Дзмітрый сышоў з пракуратуры па пагадненні бакоў, распавёў ён Hrodna.life. Ад іншых каментароў былы пракурор адмовіўся.

Дзмітрый Грыцук — памочнік пракурора горада Гародні юрыст 2 класа, як можна даведацца на сайце гарвыканкама. Да працы ў пракуратуры г. Гародні быў памочнікам пракурора Лідскага раёна.

У прэс-службе пракуратуры на пытанні Hrodna.life папрасілі зрабіць пісьмовы зварот.

Дзмітрый Грыцук падтрымліваў абвінавачванне па справе Аляксея Лапы ў пачатку судовага следства. Пазней дзяржабвінаваўцам стаў Георгій Смольскі. Таксама ў студзені за гвалт у дачыненні да супрацоўнікаў органаў унутраных спраў пачалі судзіць чатырох чалавек па падзеях 27 верасня, дзе дзяржабвінаваўцам выступаў Дзмітрый Грыцук. У канцы лютага Грыцука змяніў Сяргей Пятрашка.

hrodna.life