У Лунінцы затрыманы Аляксандр Неўдах
Лунінецкая міліцыя ўначы затрымала сябра Беларускай сацыял-дэмакратычнай партыі (Грамада) Аляксандра Неўдаха. У 24 гадзіны міліцыянты ўварваліся да яго ў кватэру, дзе ён быў са сваёй дзяўчынай Дыянай. Сказалі, што Неўдах падазраецца ў нападзе на дзяўчыну і скраданню ў яе сумачкі. Хоць увесь вечар мужчына быў дома з Дыянай, кажа яго сябра Леанід Дубаносаў:
– Забралі ў УУС, пратрымалі каля трох гадзін. Вымушаны былі адпусціць, таму што не змаглі скласці пратакол. Адпусцілі. Толькі ён выйшаў на вуліцу, пад’ехала машына ДАІ, яго забралі і павезлі на медэкспертызу. Ён быў цвярозы, але яго ўсё роўна забралі.
Міліцыянты паспрабавалі забраць таксама і дзяўчыну Аляксандра Неўдаха Дыяну з яе дома. Але яна катэгарычна адмовілася пакідаць хату і садзіцца ў машыну міліцыі, кажа Дыяна:
– Запатрабавалі, каб я назвала свае прозвішча, імя і імя па бацьку. Сказала працую я ці не. Абышлі вакол хаты. Гаворка ішла на падвышаных танах. Самі яны не прадставіліся.
Бацькоў Неўдаха і Дыяну пужалі тым, што Аляксандру свеціць не меней чым 5 гадоў. Потым сказалі, што яго затрымалі за „палітыку”, каб не пайшоў на плошчу, дзе меліся сабрацца людзі. І дабавілі, што яшчэ арыштуюць Леаніда Дубаносава і Віталя Каласюка, кажа Дыяна.
Беларускае Радыё Рацыя
