У праваслаўных вернікаў пачаўся Вялікі пост
Праваслаўныя вернікі сёння, 2 сакавіка, уступаюць у самы галоўны і строгі Вялікі пост, які завершыцца 19-га красавіка. Вялікі пост доўжыцца сем тыдняў перад Вялікаднем і складаецца з саракадзённага і посту Страсной сядміцы. Кожны перыяд мае свой сэнс і асаблівасці.
“Самае галоўнае ўстрыманне – духоўнае”, – адзначае пратаірэй Вячаслаў Пташынскі:
– Перадусім на галоўным месцы стаіць пост духоўны, калі мы спрабуем заўважыць у сабе нейкую страсць, якая нас точыць, і ўсе сілы накіраваць на збаўленне ад гэтай страсці. І кулінарны пост з’яўляецца толькі дапаможным сродкам, які нагвадаем нам, што мы праз барацьбу з нашымі страсцямі маглі дасягнуць сапраўднай мэты.
„Устрымлівацца ад усяго таго, што раніць сэрца чалавека”, – кажа святар Аляксандр Балоннікаў, настаяцель царквы святых Барыса і Глеба ў Гародні:
– Увесь пост, усе малітвы, устрыманне ад ежы, ад таго вяселля, якое звычайна бывае – гэта ўсё павінна дапамагчы чалавеку зразумець, што не ўсё ў яго ўладзе, усё ва ўладзе Божай. Праз разуменне сваёй немачы чалавек таксама прыходзіць да Бога.
Першы тыдзень Вялікага посту адрозніваецца асаблівай строгасцю. У першыя чатыры дні на вячэрнім богаслужэнні чытаецца Вялікі пакаянны канон святога Андрэя Крыцкага. У пятніцу, па заканчэнні ранішняга набажэнства, адбываецца асвячэнне куцці ў памяць пра вялікамучаніка Фёдара Цірона.
Беларускае Радыё Рацыя
