У Воршы створана рэгіянальная арганізацыя прафсаюза РЭП



Больш за 60 чалавек увайшлі ў рэгіянальную ячэйку прафсаюза РЭП, якая створана ў Воршы. Многія з людзей ужо даўно далучыліся да рэспубліканскай арганізацыі, а яшчэ каля 70 чалавек збіраюцца падаць заявы. На ўстаноўчым сходзе прысутнічалі кіраўнік прафсаюзу Генадзь Фядыніч ды кіраўнік Віцебскай рэгіянальнай структуры Георгій Разумаў.

2016-12-20_bahusevic_rep

Старшынёй аршанскай структуры абраны Аляксандр Булаўка. Ён паведаміў «Радыё Рацыя», што ў Воршы прафсаюз мае кваліфікаванага юрыста і распачаў працу па абароне грамадзян.

— Выбралі старшыню, выбралі прафкам, нам прадставілі, хто будзе ў нас юрыстам. Наша галоўная мэта — абарона правоў чалавека. За апошні час мы выйгралі некалькі працэсаў, прысутнічаем у судзе не толькі як юрысты, але і маральная падтрымка. Ёсць чыгуначнікі, ёсць цепласетка, з садка, ясляў, пенсіянеры, рабочыя. У нас ёсць вельмі кваліфікаваны юрыст – Аляксандр Масалкоў.

Бліжэйшыя пытанні, якія збіраецца разглядаць прафсаюз РЭП у рэгіёне – падатак на дармаедаў, ціск на рабочых на прадпрыемствах, скасаванне працоўных кантрактаў людзей. У рэгіянальную ячэйку ўваходзяць жыхары Воршы, Дуброўны, Талачына і іншых гарадоў і вёсак.

Кастусь Багушэвіч, Беларускае Радыё Рацыя, Ворша