Ва Украіне запускаюць сайт ідэнтыфікацыі баевікоў



Валанцёры праекта „Міратворац” запускаюць онлайн-сістэму па распазнанні сепаратыстаў, тэрарыстаў і іншых злачынцаў, называецца Identigraf.

Пра гэта паведаміў у Facebook народны дэпутат, член калегіі МУС Антон Герашчанка.

Паводле яго слоў, запуск сайта адбудзецца апоўначы перад Днём незалежнасці, 24 жніўня.

„Унікальная, не маючая аналагаў у свеце, адкрытая для ўсіх і кожнага”, — апісаў новую сістэму Герашчанка.

Ён распавёў, што распрацоўка гэтай сістэмы заняла 9 месяцаў і была праведзена ў супрацоўніцтве з адной з самых вядомых сусветных сацыяльных сетак.

„Унікальнасць гэтай сістэмы ў тым, што гэта першая ў свеце сістэма, якая будзе працаваць у адкрытым доступе ў сетцы Інтэрнэт для пошуку сепаратыстаў, тэрарыстаў і злачынцаў. Усе іншыя падобныя сістэмы, заснаваныя на алгарытме распазнання асоб, якія працуюць або ў рэжыме сакрэтнасці ў офісах вядучых спецслужбаў, або выкарыстоўваюцца ў закрытым рэжыме ў камерцыйных мэтах”, — кажа Герашчанка.

Па словах Герашчанкі, сістэма Identigraf зможа за 20-30 секунд апрацоўваць мільёны фотаздымкаў сепаратыстаў, тэрарыстаў і баевікоў, сабраных валанцёрамі цэнтра „Міратворац”.

Ён адзначыў, што сістэма, у прыватнасці, дапаможа праверыць, ці быў той ці іншы чалавек замяшаны ў антыўкраінскіх выступах або ваенных дзеянняў супраць Украіны.

„Могуць быць устаноўлены асобы расейскіх ваенных, якія ўварваліся без абвяшчэння вайны ў Крым і Данбас і забівалі нашых салдат і афіцэраў”, — заявіў дэпутат.

Ён таксама даў спасылку на новы сайт і паведаміў, што рэсурс ужо працуе, але пакуль толькі ў тэставым рэжыме.

„Пакуль, да 24 жніўня, гэты сайт працуе ў тэставым рэжыме і на ім апублікаваны інструкцыі, як вы можаце дапамагчы нашай краіне і ўсяму свету ў справе вызначэння тых асоб, хто падняў руку на незалежнасць і цэласнасць Украіны”, — сказаў Герашчанка.

novychas.by паводле pravda.com.ua