Выбухам на пустцы ў мікрараёне Ангарская траўмаваны 19-гадовы жыхар Менска



У Менску выбухам на пустцы траўмаваны малады чалавек.

Як паведаміў Следчы камітэт, увечары 9 чэрвеня следча-аператыўная група выязджала на месца надзвычайнага здарэння пасля паведамлення пра атрыманне траўмаў 19-гадовым маладым чалавекам у выніку выбуху неўстаноўленага прадмета на пустцы ў Заводскім раёне.

З прыцягненнем экспертаў-выбухатэхнікаў цэнтральнага апарату Дзяржаўнага камітэта судовых экспертыз праведзены агляд месца здарэння. Апытаныя відавочцы, прызначаныя экспертныя даследаванні.

Менчук з пашкоджаннямі канечнасцей шпіталізаваны.

„Следчыя ў цесным узаемадзеянні з супрацоўнікамі міліцыі працягваюць устанаўліваць усе абставіны здарэння. Праца на месцы здарэння завяршылася раніцай”, — гаворыцца ў паведамленні.

Мяркуючы па фатаграфіях у сацсетках, выбух здарыўся на пустцы паміж вуліцамі Ангарская і Варвашэні (былая Енісейская). На гэтым месцы раней была турма.

belapan.by