Вырабленая ў Беларусі вакцына „Спадарожнік V” паступіць у абарот да чэрвеня 2022 года
Пра гэта паведаміў вузкаму колу журналістаў 12 лістапада прэм’ер-міністр Раман Галоўчанка падчас наведвання РУП „Белмедпрэпараты”.
На прадпрыемстве прэзентавалі інвестыцыйны праект арганізацыі поўнага цыкла фармацэўтычнай вытворчасці вакцыны „Спадарожнік V” на тэрыторыі Беларусі.
„Праект рэалізуецца хуткімі тэмпамі, — цытуе Галоўчанку прэс-служба ўрада. — Цяпер знаходзімся на прамежкавай стадыі. Завяршаецца мантаж біятэхналагічнага абсталявання ад вядучага сусветнага вытворцы. У снежні тут будзе закладзеная першая валідацыйная серыя. Гэта 10% ад прамысловай серыі, якая паступіць на захоўванне і будзе правераная на стабільнасць. Калі ўсё будзе добра, то далей пачнуцца працэдуры рэгістрацыі ў Беларусі і Расеі. Зыходзячы з графіка, да пачатку лета наступнага года вакцына будзе гатовая да паступлення ў грамадзянскі абарот у Беларусі і на экспартны рынак. Агульны аб’ём яе вытворчасці — больш за 10 млн доз штогод, з якіх 4 млн разлічана для Беларусі”.
Як адзначыў прэм’ер-міністр, пры неабходнасці на вытворчасці можна будзе выпускаць не толькі „Спадарожнік V”, але і іншыя сучасныя біяпрэпараты. „Вакцына стане першым прэпаратам, які будзе засвоены на гэтых магутнасцях, але абсталяванне тут мае ўніверсальны характар і дазваляе вырабляць шырокі спектр запатрабаваных для рынку біяпрэпаратаў. Гэта ўнікальнае месца з пункту гледжання аснашчанасці для фармацэўтычнай і біятэхналагічнай галіны краіны, сапраўдны прарыў”, — падкрэсліў ён.
Як паведаміў падчас прэзентацыі генеральны дырэктар РУП „Белмедпрэпараты” Сяргей Бяляеў, кошт інвестыцыйнага праекта складае больш за 56 млн даляраў. На поўныя магутнасці вытворчасці тут плануюць выйсці ў 2022-2023 гадах. „Тэрмін акупнасці складае каля 3-4 гадоў. Усё будзе залежаць ад кан’юнктуры рынку, якая складзецца на працягу гэтага перыяду”, — цытуе чыноўніка прэс-служба Міністэрства аховы здароўя.
Раней паведамлялася, што Беларусь таксама мае намер распрацаваць і запусціць у вытворчасць уласную вакцыну. Аляксандр Лукашэнка 3 лістапада падпісаў указ аб рэалізацыі інвестпраекта па выпуску айчыннай вакцыны супраць COVID-19 на ААТ „БелВітуніфарм”. Праект прадугледжвае будаўніцтва ў вёсцы Доўжа Віцебскай вобласці завода з рэканструкцыяй існуючай вытворчасці. Распрацоўку вакцыны вядуць падведамныя Міністэрству аховы здароўя і НАНБ арганізацыі, падрыхтаваная серыя прататыпнага варыянту вакцыны, падкрэсліваецца ў паведамленні.
Паводле інфармацыі Міністэрства аховы здароўя, айчынную вакцыну ад каронавірусу плануецца выпусціць у грамадзянскі абарот у 2023 годзе.
Зараз у Беларусі прышчапляюць трыма вакцынамі: расейскімі „Спадарожнік V” і „Спадарожнік Лайт” і кітайскай вытворчасці карпарацыі Sinopharm.
Падчас наведвання Лідскай цэнтральнай раённай бальніцы (Гарадзенская вобласць) 26 кастрычніка Лукашэнка заявіў, што ў Беларусь няма сэнсу завозіць заходнія вакцыны супраць каронавірусу. Ён мяркуе, што расейская і кітайская вакцыны ад COVID-19 „зарэкамендавалі сябе значна лепш, чым заходнія аналагі”.
Лукашэнка таксама сцвярджаў, што заходнія вакцыны патрэбныя беларускім апазіцыянерам, каб выехаць з кавідным пашпартам на Захад: „Нам падкідваюць вось гэтыя опы (апазіцыянеры) ідэю: завязі Pfizer, хай будзе, Johnson & Johnson, Moderna і іншае. Для чаго? Каб яны маглі прышчапіцца, атрымаць пашпарт і ехаць туды да сваіх — атрымліваць інструкцыі. Каб выехаць на Захад, вось для чаго ім трэба. Едзьце туды і там вакцынуйцеся”.
На 11 лістапада 3 млн 145 тыс. чалавек атрымалі першую дозу вакцыны супраць COVID-19, поўны курс вакцынацыі прайшлі 2 млн 442 тыс.
