Яблычны Спас на Шаркоўшчыне



“Яблычны спас” адсвяткавалі на Шаркоўшчыне ў вёсцы Алашкі. Ужо трэці год як гэтае свята змяніла назву. Раней шаркаўшчане і госці раёна адзначалі “Светлы яблычны спас –  сікораўскай душы часцінка”. Свята ладзілася ў гонар земляка, садавода-аматара Івана Сікоры. Зараз пра яго ўзгадваецца ўсё менш, хоць  зялёны яблык і лічыцца брэндам раёна.

Кажа сталы ўдзельнік фестывалю і мясцовы жыхар Язэп Квач:

– Дык вось, гэтай Сікораўскай душы, яе часьцінкі неяк тут мала, і напэўна з кожным годам становіцца ўсё менш і менш, і менш. Не заслужана, я лічу, гэта. Таму што нашая зямля, Алашкаўская, і нават уся Шаркоўшчынская як без імя Сікоры. Хто тут яшчэ? Драздовіч праходзіў, але ён Глыбоцкі. Цітовіч быў, але ён Пастаўскі. Таму наш сапраўдны славуты зямляк заслугоўвае без перабольшвання павагі. І павінна, каб яго дух тут адчуваўся. А вось гэтага я не заўважаю.

У мінулым годзе фэст “Яблычны спас” набыў статус міжнароднага. Сёлета на яго завіталі госці і творчыя калектывы з Літві і Латвіі. Таксама свята наведаў міністр культуры Барыс Святлоў і консул Латвіі Угіс Скуя.

Таццяна Смоткіна, Беларускае Радыё Рацыя

Фота аўтаркі