Атмасферу ранняга Сярэднявечча створаць на этнасвяце ў Чавускім раёне
У аграгарадку Радамля Чавускага раёна 17-18 жніўня пройдзе этнасвята „У госці да радзімічаў”.
Арганізатары падрыхтавалі насычаную двухдзённую праграму з тэатралізаванымі дзеяннямі пры ўдзеле клубаў гістарычнай рэканструкцыі „хірд Ваўкі” (Жодзіна) і Vitland (Мінск). Гасцей чакаюць этнатанцы, забаўляльныя праграмы, інтэрактыўныя зоны, майстар-класы, паказальныя баі і кухні радзімічаў. Мясцовыя жыхары прадставяць традыцыйныя рамёствы ў музеі пад адкрытым небам. Плануецца правесці конкурс на лепшую стылізацыю культуры і побыту насельніцтва эпохі ранняга Сярэднявечча „Час старажытнасці”. На выстаўках-продажах можна будзе набыць тэматычныя сувеніры.
Атмасферу свята падтрымаюць выступленні этнапраекта Патрыцыі Свіцінай, магістра мастацтваў, старшага выкладчыка кафедры этналогіі і фальклору Беларускага дзяржаўнага ўніверсітэта культуры і мастацтваў Наталлі Матыліцкай, этнагруп „Хмельны Вір”, „Арацэя”, Yudjin, „Радагасць” і інш. Гледачы таксама ўбачаць вогненнае шоу ад калектыву AGNI show (Віцебск). Хэдлайнерам стане праект Znich & Rutvica.
Паводле адной з гіпотэз, на тэрыторыі, дзе штогод праходзіць этнафестываль, калісьці размяшчалася гарадзішча радзімічаў, а потым на гэтым месцы быў узведзены замак, рэшткі ўмацаванняў якога захаваліся да нашых дзён. Цяпер на пасадзе Замкавай гары створаны музей пад адкрытым небам, куды ўваходзяць збудаванні, пабудаваныя ў стылі эпохі ранняга Сярэднявечча. Тут можна ўбачыць капішча Перуна, комплекс стылізаваных паўзямлянак (у такіх жылі нашы далёкія продкі), прыстасаванне для здабычы жывога агню, печ для абпалу керамічнага посуду.
