Паэту “Музыкі вятроў” – 60
1 студзеня выдатнаму паэту, публіцысту, сябру Саюза беларускіх пісьменнікаў, грамадскаму актывісту са Свіслачы Анатолю Валюку спаўняецца 60 гадоў з дня нараджэння.
Анатоль Валюк нарадзіўся ў вёсцы Вішнеўка на Зэльвеншчыне. Пасля заканчэння Пасуціцкай сярэдняй школы, вучыўся ў Бабруйскім мастацкім вучылішчы і на філалагічным факультэце Гарадзенскага ўніверсітэта імя Янкі Купалы.
Пасля службы ў войску, вярнуўся на радзіму і працаваў на Ваўкавыскім заводзе ліцейнага абсталявання, у МПМК-66, настаўнічаў на Зэльвеншчыне і Свіслаччыне, быў журналістам Свіслацкай раённай газеты. Выбіраўся дэпутатам райсавета. А напачатку 2000-х гадоў з-за сваёй грамадскай дзейнасці страціў працу ў школе. Таму часова працаваў на будоўлях Масквы…
Анатоль Валюк (стаіць у цэнтры) сярод сяброў Саюзу беларускіх пісьменнікаў
Яшчэ са школьных гадоў пачаў пісаць вершы. Друкаваўся ў раённых, абласных і рэспубліканскіх выданнях, а таксама ў зборніках “Маладыя галасы”, “Зоры над Зальвянкай”, “Новы замак” і ў іншых. У 2008 годзе сябрамі быў выдадзены яго зборнік вершаў і перакладаў “Музыка вятроў”.
У вершы “Інсургенты” паэт Анатоль Валюк аднойчы напісаў:
Не, мы не разбіты, мы шаблі, пістолі,
Яшчэ не паклалі ў апошнім баі.
Заўжды нагатову стаяць нашы коні,
Хапае запалу ў гарачай крыві.
Гарачага запалу ў крыві, здароўя, творчага натхнення мы жадаем і надалей табе, спадар Анатоль! З юбілеем!
Барыс Баль, Беларускае Радыё Рацыя
