«Поўня» Міхася Андрасюка (абноўлена)



Новую кнігу мастацкай прозы Міхася Андрасюка «Поўня» прэзентавалі ў Музеі і асяродку беларускай культуры ў Гайнаўцы.

„Поўня празаічнага таленту Міхася Андрасюка раскрываецца перад намі ў гэтай кнізе”, – адзначае Яўген Вапа, галоўны рэдактар штотыднёвіка “Ніва”:

– “Поўня” – гэта поўня жыцця нашага, бачнага і нябачнага. Гэта поўня майстэрства, якое выспявала гадамі. Гэта была цяжкая праца аўтара над тым, каб свае думкі, свой жыццёвы досьвед, досьвед стагоддзяў сваіх бабуляў, дзядуляў адлюстраваць у літаратурнай форме, якая цікавая чытачу. Чытач будзе мець дачыненне з гісторыямі, у якія ён няўзмозе паверыць, але яны ў нашым свеце і ў свеце нашых бацькоў, дзядоў былі рэальнымі. Бо перапляталася міфічнае з жыццёвым, праўдзівае з непраўдзівым. Такім быў свет пушчанскіх расказаў. І гэтае слова, якое тут збіралася стагоддзямі, нарэшце  ўспыхнула такімі аповесцямі. Гэта кніжка, пра яку будуць доўга гаварыць, чытаць і чакаць новых кніг.

Міхась Андрасюк, аўтар „Поўні”:

– “Поўня” – яна да шчэнту беларуская. Яна паказвае маленькую супольнасць, жменьку насельніцтва, якое знаходзіцца на шляху гісторыі ці вялікай гістарычнай махіны. З пакон вякоў там знаходзіцца на сутыкненні адначасна розных імперый, інтарэсаў, дзяржаў. І знаходзіцца там як сведак, хутчэй за ўсё, бо не ўдзельнік. Вось пра гэтую нашую беларускую супольнасць кніжка і беларускі наш менталітэт. Нашае чаканне на цуд, таксама беларускае, прывязанасць да свайго месца на зямлі. І беларуская згода на свой лёс, нават калі ён цяжкі.

«Гэта мая першая кніга, у якой я не пішу пра маё роднае мястэчка», – кажа аўтар:

– Факт,  што Гайнаўкі тут няма. Я шукаў штосьці новае для сябе, каб выйсці з гэтай маленькай гайнаўскай прасторы. Дзесьці далей, што не абазначае, што Гайнаўкі ўжо не будзе. Яна можа да мяне яшчэ вярнуцца ў чарговай кніжцы.  Канешне, калі такая будзе. Бо на дадзены момант я не ведаю… 

Ужо плануюцца чарговыя прэзентацыя «Поўні» і аўтарскія сустрэчы з падляшскім пісьменнмкам, у тым ліку і ў Беларусі.

Цалкам матэрыял у далучаным гукавым файле:

[Not a valid template]

Давід Гайко, Беларускае Радыё Рацыя

* * *

Урэшце дачакаліся. Пасля доўгага зацішша перад Чытачамі неверагодна таямнічая «Поўня» Міхала Андрасюка. Літаратура бязмежная ў сваёй лёсавызначальнасці часу і прасторы. Сваімі вобразамі і словамі выспявала стагоддзямі ў магічным свеце Белавежскай пушчы і ўзляцела звыш межаў жыцця і смерці. Чытаўшы гэтую кнігу мы можам на хвіліну адчуваць сябе ў некалькіх вымярэннях, але без патрэбы ставіць лішнія пытанні наконт свету бачанага і небачанага. Поўня празаічнага таленту Міхала Андрасюка раскрываецца перад намі.

Яўген Вапа. Доўгі Брод

* * *

Міхал Андрасюк нарадзіўся 2 снежня 1959 года ў Гайнаўцы на Падляшшы. Дзяцінства і маладосць правёў у вёсцы Войнаўка ў гміне Дубічы-Царкоўныя, дзе і зараз пражывае. Скончыў беларускі ліцэй у Гайнаўцы (1978), працаваў настаўнікам і каменячосам, супрацоўнічае з Беларускім Радыё Рацыя. Дэбютаваў у беластоцкай «Ніве» (1979) вершамі. У гэтым выданні друкуецца і надалей. Піша па-беларуску і па-польску. Аўтар кніг прозы «Фірма» (Беласток, 2000), «Мясцовая гравітацыя» (Беласток, 2004), «Белы конь» (Беласток, 2006, перакладзены і выдадзены на польскай мове ў 2011), «Вуліца Добрай Надзеі» (Мінск, 2010), «Wagon drugiej klasy» (Беласток, 2010), «Krzyżyk» ( Беласток, 2015).

Міхал Андрасюк узнагароджаны «Залатым апострафам» часопіса «Дзеяслоў» за сваю прозу, якая друкавалася на яго старонках у 2009 годзе. Атрымаў літаратурную прэмію прэзідэнта горада Беластока імя Веслава Казанэцкага за 2011 год за кнігу «Белы конь».

* * *

Музей і асяродак культуры ў Гайнаўцы запрашае на прэзентацыю новай кнігі Міхася Андрасюка „Поўня”. Сустрэча пройдзе 14-га сакавіка а 17-й гадзіне. Мерапрыемства павядзе Мікола Ваўранюк.

А чаму якраз загаловак кніжкі «Поўня»? – тлумачыць аўтар.