Сустрэчы ў глыбінцы Дзятлаўшчыны



Дзве сустрэчы са школьнікамі і настаўнікамі Раготнаўскай і Лявонавіцкай базавых школ Дзятлаўскага раёна правялі менскі бард і журналіст Зміцер Бартосік, пісьменнік, краязнавец і журналіст са Слоніма Сяргей Чыгрын і дзятлаўскі грамадскі актывіст Валерый Петрыкевіч.

Вёска Раготна знаходзіцца за 23 кіламетры ад Дзятлава, а вёска Лявонавічы – за 18 кіламетраў ад райцэнтра. Сюды і прыехалі творчыя людзі, каб распавесці пра беларускія кнігі, бардаўскую песню і пра гісторыка-краязнаўчыя справы.

Валерый Петрыкевіч выступленне сваё прысвяціў 500-годдзю беларускага кнігадрукавання, Сяргей Чыгрын цікава распавядаў пра беларускую мініяцюрную кнігу. А Зміцер Бартосік радаваў прысутных бардаўскімі песнямі.

Госці не толькі выступалі, але і правялі некалькі літаратурных конкурсаў, адказалі на пытанні настаўнікаў і вучняў.

Беларускае Радыё Рацыя, Дзятлаўскі раён